Áleýmettik jelilerdi únemi qarap otyramyn - Baqyt Sultanov

ASTANA. QazAqparat - Astana qalasynyń ákimi Baqyt Sultanov áleýmettik jelilerde jarııalanǵan máselelerdi qalaısha júıelep otyratynyn aıtyp berdi, dep xabarlaıdy QazAqparat tilshisi.

Ákimniń aıtýynsha, búginde qarapaıym xalyqtyń aryz-shaǵymdary boıynsha keri baılanys ornatýǵa erekshe kóńil bólinip keledi. Máselen, iKomek sııaqty qyzmetter bar. Degenmen, áli de biraz máselelerdi sheshý kerek.

«Ákim apparatynyń jınalystarynda biz iKomek arqyly túsken árbir aryz-shaǵymdy júıelep, tıisti sharalardy qolǵa alyp otyramyz. Árıne, ákimdiktiń ashyqtyǵyn áli de jetildirý kerek. Bul - basty maqsatymyz. Sebebi bunyń barlyǵy ákimderdiń reıtıngisinde eskeriledi», - dedi B.Sultanov ótken jyldyń qorytyndysyna arnalǵan jıynda.

Osy oraıda, qala basshysy áleýmettik jeliler arqyly keri baılanysty ornatý máselesine de toqtaldy. Onyń sózine qaraǵanda, qoǵam ishindegi qazirgi kózqarasqa qaramastan osy baǵyttaǵy jumys jalǵasa beredi.

«Keıbir adamdar meni áleýmettik jelilerge kirmeıdi dep oılaıdy. Negizi, olaı emes. Osynda otyrǵan áriptesterim de jaqsy biledi. Men ózim áleýmettik jelilerge shyqqan máselelerdi júıelep, tıisti qyzmetterge jiberip otyramyn. Shyny kerek, xalyqtan túsken aryz-shaǵymdardyń ishinde usaq-túıek máseleler bolmaıdy. Qudyqtyń qaqpaǵy ashyq, kúl-qoqys jáshigi durys ornatylmady. Sonyń bárin biz bir-birimizge jiberip otyramyz», - dep atap kórsetti B.Sultanov.