Áleýmettik jelilerdegi aqparattardyń kóbisi senimdi jáne tolyq emes – Adam quqyqtary jónindegi ýákil
Buǵan deıin spıker óńirlerdegi ýaqytsha ustaý ızolıatorlaryna baryp, ustalǵan azamattarmen suhbattasyp júrgenin aıtqan edi. Birneshe kúnde olar 11 óńirdegi 34 mekemege barǵan.
«Osy ýaqytta bizge, advokattarǵa jáne basqa qorǵaýshylarǵa ustalǵan adamdarǵa kirýdegi qıyndyqtar, sonymen birge týysqandarǵa habardar etpeý, alǵashqy saǵattarda medıtsınalyq kómek kórsetpeý nemese negizgi ustaý týraly shaǵymdar jasaldy. Mundaı faktilerge jol berilmeýi kerek. Sondyqtan árbir túsken aryz-shaǵymdardy Bas prokýratýra men Іshki ister mınıstrligine jiberemiz. Keshe brıfıng barysynda prokýratýra ókili habarlaǵandaı, Almaty qalasy prokýratýrasynyń tekserý nátıjesinde 71 azamatqa ákimshilik jaza sharalary jeńildetildi. Jáne 91 azamat bosatyldy. Bul óte mańyzdy. Óıtkeni eń bastysy – halyqtyń áldilet pen zańdylyqqa degen senimi», - dedi E. Ázimova Ortalyq kommýnıkatsııalar qyzmetinde ótken bıýaspasóz máslıhatynda.
Spıkerdiń aıtýynsha, Іshki ister jáne Densaýlyq saqtaý mınıstrlikteri men Bas prokýratýraǵa barlyq qabyldanǵan sharalar týraly BAQ-ta tolyq habarlaý jóninde ótinish jasaldy.
«Sońǵy kúnderi ózderińiz kórgendeı, bul ótinish eskerildi. Barlyq azamattardyń aqparatqa qol jetkizý quqyǵyn barynsha qamtamasyz etý óte mańyzdy. Birinshi kezekte qylmystyq nemese ákimshilik sot tóreligine adamdar týraly sóz bolyp otyr. Shetel azamattary úshin de osyndaı aqparat qajet. Sondyqtan shetel azamattaryn ustaý týraly sheteldik dıplomatııa ókildikterine dereý habarlaý kerek. Prokýratýra osyndaı habarlardy jetkizemiz dep aıtty, biz oǵan senemiz», - dedi Elvıra Ázimova.
Sonymen birge, tártipsizdik bolǵan kúnderi aqparat júıesiniń zaqymdalýyna baılanysty, ustalǵandardyń kópshiligin ıdentıfıkatsııalaý ýaqytsha qıyndyq týyndatqan.
«Sondyqtan kópshiliginiń týystary olardyń ustalǵany týraly aqparatty kesh aldy. Sondaı-aq osyndaı jaǵdaı medıtsınalyq mekemelerde de boldy. Azamattardyń kópshiligi munda qujatsyz túsken. Birinshi suraq – alǵashqy medıtsınalyq kómek kórsetý máselesi bolsa, olardyń týystaryna habarlaý ekinshi suraq boldy. Eń bastysy – adamnyń ómiri. Olardyń kópshiliginde jeke basty kýálandyratyn qujattar bolmaǵan. Sondyqtan, jergilikti jerlerdegi ishki ister organdary men densaýlyq saqtaý uıymdary mundaı aqparatty dereý týystaryna jáne qoǵamdyq uıymdarǵa berýi qajet. Sebebi mundaı jekelegen aqparat áleýmettik jelilerde kóp ekenin kórip otyrmyz. Biraq mundaı aqparattyń kóbisi senimdi jáne tolyq emes. Sondyqtan biz resmı retinde berilgen aqparatqa súıenýimiz kerek», - dep túsindirdi E. Ázimova.