Áleýmettik jelilerde #Zhenis70 onlaın fotoaktsııasy jarııalandy

ASTANA. QazAqparat - «Qazaqstan 2050» Jalpyulttyq qozǵalysy Jeńistiń 70 jyldyǵy qarsańynda #Zhenis70 onlaın fotoaktsııasyn jarııalady, dep habarlaıdy atalmysh qozǵalystyń baspasóz qyzmetinen.

Qozǵalys belsendileri respýblıkalyq aktsııa arqyly soǵys jyldaryndaǵy Qazaqstan halqynyń erligine taǵzym etip, maıdanda jáne tylda jankeshtilik kórsetken ardagerlerge degen syılastyq sezimin bildirip, óskeleń urpaq boıynda elimizdiń beıbit ómiri úshin azamattyq jaýapkershiligin nyǵaıtýdy kózdep otyr.

«Soǵys myńdaǵan otbasylardyń ómirin oısyratyp ketti. Elimizdiń árbir shańyraǵy, árbir kóshesi soǵys tarıhynan syr shertedi desek artyq aıtqandyq emes. Keı ardagerler maıdanda qan keshse, keıbiri tylda tynymsyz eńbek etip, jeńis kúnin jaqyndatyp, erlik kórsetti. Soǵys tarıhy aınalamyzda, biz de sonyń bir bóligimiz. Endeshe barlyǵyńyzdan soǵys jyldaryndaǵy zulmat ýaqyttan syr shertetin kóne sýretterdi jarııalaýyńyzdy suraımyz. Olar mindetti túrde ardagerlerdiń sýretteri bolýy shart emes. Sol zamannyń tynysyn beıneleıtin kez-kelgen sýret bolsa bolǵany», - deıdi «Qazaqstan-2050» Jalpyulttyq qozǵalysynyń medıadırektory Qanat Áýesbaı. Sýretterdi qatysýshynyń Instagramdaǵy jeke profaılynda nemese túrli toptarda #Zhenis70 tegimen birge jarııalaý shart. Sýretter 2015 jyldyń 9 mamyryna deıin jarııalanýy qajet. Nátıjesinde eń kóp laık jınaǵan fotosýretti jarııalaýshy Iphone 6 telefonyn jeńip alady.

Fotosýretterdi Instagramnan ózge de jelilerde jarııalaı berýge bolady.

Alaıda aktsııa qorytyndysy boıynsha tek Instagram jelisinde #Zhenis70 tegimen jarııalanyp, eń kóp laık jınaǵan fotosýret qana jeńimpaz bolady.