Áleýmettik jelidegi saýdagerlerdiń 95 paıyzy salyq tóleýge mindetteldi

ASTANA. QazAqparat - Áleýmettik jelide saýdamen aınalysqandardyń 95 paıyzy salyq tóleýge mindetteldi. Bul týraly búgin tilshilerge bergen suhbatynda QR QM Memlekettik kirister komıtetiniń tóraǵasy Dáýlet Erǵojın málim etti.

«Biz kúdikke ilingenderdiń (Facebook pen Instagram arqyly saýda jasaǵandardyń) basym bóligin shaqyrttyq. Olardyń kóbi almatylyqtar - ol jaqta barlyǵy Instagram-da otyrady, saýda jasaıdy. Olarǵa barlyǵyn túsindirdik, 100 paıyzdyń ishinde 95 paıyzy jeke kásipker, olardyń barlyǵy qazir salyq tóleıdi», - dedi D.Erǵojın.

Onyń habarlaýynsha, «Qazposhta» onlaın-saýdanyń jańa platformasyn jasap shyqqan.

«Ol jerde barlyǵy bizdiń júıelermen baılanystyrylǵan. «Qazposhtada» isteıtin adam, tirkelýi qajet jáne salyq tóleýge tıisti. Tólem qolma-qol aqshasyz júrgiziletindikten, barlyǵy ashyq júrgiziledi, eger tutynýshyǵa taýar unamaı, ony qaıtarýdy sheshse, onyń qolynda kepil etetin qujattary bolady. Instagram-da ózińizdiń quqyǵyńyzdy qalaı qorǵaısyz? Ol erteń akkaýntyn óshire salady, bitti!», - dep jalǵady D. Erǵojın.