Áleýmettik jelidegi álipbıge qatysty 1,8 myń jazba nazarymyzda - Erden Qajybek

ASTANA. QazAqparat - Latyn negizdi qazaq jazýynyń reformasy - rýhanı jańǵyrýymyzdyń sheshýshi faktory, tereń mánge ıe bastama. Jalpyulttyq demokratııalyq kúshter koalıtsııasynyń otyrysynda Memlekettik tildi jańa álipbıge kóshirý jónindegi QR Prezıdenti janyndaǵy Ulttyq komıssııanyń Jumys tobynyń jetekshisi Erden Qajybek osylaı málim etti.

«Aqparat quraldaryna keletin bolsaq, Elbasynyń baǵdarlamalyq maqalasy jarııalanǵannan beri qazaq álipbıin reformalaý týraly eki myńǵa jýyq saraptamalyq maqalalar men paıymdaýlar jaryq kórdi. Áleýmettik jelilerde 1800-den astam mazmundy jazbalar shyqty. Osynyń barlyǵy - árdaıym bizdiń nazarymyzda», - dedi Erden Qajybek.  

Ulttyq komıssııanyń jumys tobynyń bastamasymen 20-dan astam ǵylymı-uıymdastyrý jáne ǵylymı-tájirıbelik is-sharalar ótip,  olarǵa eki aıda 2,5 myńnan astam ǵalymdar men zııaly qaýym ókilderi qatysqan.

«Elbasy tapsyrmasyna sáıkes bul keleli másele qalyń jurtshylyqtyń belsene qatysýymen iske asyrylýda. Eldiń túkpir-túkpirinen, shetelden, aýyldan da, qaladan da, halyq qalaýlylary men memlekettik qyzmetkerler, ǵalymdar men zeınetkerler, jastar men syrttaǵy otandastarymyz - bári de óz úlesterin qosýǵa tyrysýda», - dedi lıngvıst ǵalym.

Onyń aıtýynsha, jobalar suryptalyp «ınternet, IT» «túrkilik», «qazaq fılologııalyq», «aǵylshyn-eýropalyq», «UNICODE», «kırıl-latyn», «qurama», «áýesqoı» dep toptarǵa bólingen.       

«Máselen, belgili otandasymyz, tilshi professor, Qytaı azamaty Murat Sultansháripuly, Reseılik otandasymyz, máskeýlik, tanymal altaıst-túrkolog Erkolı Azerbaev, Májilis depýtaty Azat Perýashevtan, kóptegen sheteldik ǵalymdar - Eýropa men AQSh-tan, Túrkııa men Koreıadan, óńirlerden - usynystar, hattar, jobalar kelip jatyr», - dedi Erden Qajybek.