Áleýmettik jelide jalǵan aqparat taratqandar qandaı jazaǵa tartylady

ASTANA. QazAqparat – Internet jáne onlaın platformalar arqyly jalǵan aqparat nemese jarnama taratqandar 20 aılyq eseptik kórsetkish kóleminde aıyppul tóleıdi nemese 10 táýlikke qamaýǵa alynady. Bul týraly Іshki ister vıtse-mınıstri Igor Lepeha Májilis otyrysy barysynda Jibek Joly telearnasynyń mobıldi stýdııasynda bergen suhbatynda aıtty, dep habarlaıdy QazAqparat tilshisi.

Atalǵan norma Qazaqstan Respýblıkasynyń Ákimshilik quqyq buzýshylyq týraly kodeksine onlaın-platformalar jáne onlaın-jarnama máseleleri boıynsha tolyqtyrýlar engizý týraly» zań jobasynda kózdelgen.

«Ákimshilik kodekste jańa bap engizildi. Ol onlaın-platformalar quraldary arqyly jalǵan aqparattardy taratý boıynsha jaýapkershilikti kózdeıdi. Búgingi tańda óte kóp jalǵan aqparattar taralyp jatqanyn bilemiz», - dedi Igor Lepeha efır kezinde.

Sondaı-aq mınıstrdiń orynbasary WhatsApp jelisi de onlaın-platformaǵa jatatynyn aıtty.

«Qazir ol úshin jaýapkershilik joq. Aıtalyq, pandemııa kezinde azamattar kóptegen jalǵan aqparat taratty. Olardyń eshqaısysy jaýapkershilikke tartylǵan joq. Sonymen qatar qazir kıberbýllıngke qatysty kóptegen aqparat bar. Kıberbýllıngke qatysty jelide tarap jatqan vıdeolar óte kóp, keıbirinde balalardy áldebir iske qatysty dálelsiz aıyptap jatady. Keıin ol jelige keńinen taralady, bul aýyr zardapqa ákep soǵýy yqtımal. Oılanbaı jasalǵan is-áreketterdiń zalal ákeletinin túsinemiz. Buǵan deıin zańnan tys qalyp keldi», - deıdi vıtse-mınıstr.

Onyń aıtýynsha, endi jalǵan aqparat taratqany úshin 20 AEK-ke deıin (shamamen 60 myń) aıyppul qarastyrylady. Eger bir jyl ishinde azamat jalǵan aqparat taratý faktisine qaıta jol berse, onda ol 10 táýlikke deıin ákimshilik qamaýǵa alynýy nemese 40 AEK kóleminde aıyppul tóleýi tıis. Materıaldardy ishki ister organdary oryndaıdy, biraq sheshimdi sot shyǵarady.

«Bul jerde áńgime aldymen blogerler men zańdy tulǵalar týraly bolyp otyr. Barlyǵyn jappaı jaýapkershilikke tartý bolmaıdy», - dedi Igor Lepeha.