Áleýmettik jelide qyz bolyp tanysyp, 3 mln teńge alǵan: Qostanaıda er adam ustaldy

QOSTANAI. QazAqparat – Qostanaı polıtseıleri áleýmettik jelilerde ózin qyz retinde tanystyryp, aqsha surap kelgen alaıaqty ustady, dep habarlaıdy QazAqparat Polisia.kz-ke silteme jasap.

3 sáýirde Qostanaı qalasynda oblystyq Polıtsııa departamentiniń kıberqylmysqa qarsy kúres bóliminiń qyzmetkerleri Qostanaı oblysynyń 27 jastaǵy týmasyn ustady.

Málim bolǵandaı, er adam áleýmettik jelilerde qyz retinde tirkelip, tanysynan ara-tura emge aqsha surap otyrǵan.

«Kúdikti qyzdyń atynan jalǵan paraqsha ashyp, áleýmettik jeliler arqyly aldaý jáne senimdi asyra paıdalaný arqyly emdelý syltaýymen shamamen 3 mln teńgeni ıemdengen. Jábirlenýshi jalǵan qyzǵa shamamen 5 aı kóleminde aqsha aýdaryp otyrǵan. Polıtseıler zattaı dáleldemelerdi – bank kartalaryn, SIM-kartalardy jáne uıaly telefondy tárkiledi», – dedi Qostanaı oblysy PD kıberqylmyspen kúres bóliminiń bastyǵy Oljas Maǵyparov.

Sotqa deıingi tergeý bastaldy.