Áleýmettik volonterlik jobalarǵa qomaqty qarjy bólinedi

NUR-SULTAN. QazAqparat – Áleýmettik volonterlik jobalarǵa memleket 170 mln teńge bólinedi. Bul týraly volonterlerdiń «BIRGEMIZ» respýblıkalyq front-keńsesin resmı iske qosý sharasynda QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Jańa bastama» dep atalatyn bir jobaǵa nazarlaryńyzdy aýdarym keledi. Memleket 170 mln teńge bóledi. Bul 170 áleýmettik joba degen sóz. 170 volonterlik uıym 1 mln teńgeden ala alady. Olar bul aqshany jalaqy retinde almaıdy. Qarajat volonterler úshin ystyq tamaq uıymdastyrýǵa, qural-saıman satyp alýǵa, jol shyǵyndaryn óteýge jumsalady», - dedi mınıstr.

Sonymen qatar, Dáýren Abaev bıyl volonterler sanynyń artatyndyǵyna senimdi ekendigin basa aıtty.

«Myńdaǵan volonter ómirlik qıyn jaǵdaıǵa tap bolǵan balalarmen jumys isteıdi. 14 myń joǵary synyp oqýshysyn aǵylshyn tilinen Ulttyq biryńǵaı testileýge daıyndaýdy josparlap otyrmyz. 7 myńnan astam azamatqa kómek kórsetemiz», - dedi ol.