Áleýmettik turǵyn úı alý sharty qalaı ózgerdi

ALMATY. QazAqparat - 15 tamyzdan bastap, Turǵyn úı-kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasy aıasynda, jergilikti atqarýshy organdarda baspana kezeginde turǵan azamattar úshin áleýmettik turǵyn úıler jańa ádispen bólý qolǵa alyndy.

Bul týraly óńirlik kommýnıkatsııalar qyzmetiniń alańynda ótken baspasóz máslıhaty barysynda «Otbasy bank» AQ Almaty qalalyq fılıalynyń dırektory Danagúl Túsipova málim etti, dep habarlaıdy QazAqparat tilshisi.

Aıtýynsha, jańa tujyrymdama sheńberinde syıaqy mólsherlemesi jyldyq 5 paıyzben beriledi. Ol úshin azamattar baǵdarlamaǵa qatysýshy esebinde ákimdikte kezekte turýy kerek.

«Sondaı-aq «Otbasy banktegi» jınaq shotynda qaryz somasynyń 10 paıyzy bastapqy jarna esebinde bolýy shart. Mundaı qoljetimdi zaımdarǵa birinshi jáne ekinshi top múgedekteri men erekshe qajettiligi bar balany asyrap otyrǵandar jáne kópbalaly otbasy, ata-ana qamqorlyǵynsyz qalǵandar qatysa alady»,- dedi Danagúl Túsipova.

Taǵy bir jańashyldyq, Turǵyn úı-kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasy boıynsha, kredıt alý barysynda barlyq sanattar úshin kiriske shekteý qoıylmaıdy.

«Kiris, shekteý alynyp tastalyndy jáne de nesıe somasy boıynsha shekteý joıyldy. Nesıe somasy úıdiń qunyna teń bolady. Memlekettik baǵdarlamaǵa qatysý týraly ótinim tek otbasybank.kz portalynda júrgiziletin bolady. Demek, ótinim jalpylama qabyldanbaıdy», – dedi spıker.