Áleýmettik saladaǵy memlekettik-jekeshelik áriptestiktiń keshendi baǵdarlamasy ázirlenedi

ASTANA. QazAqparat – Memleket basshysy Qasym-Jomart Toqaev Úkimettiń keńeıtilgen keńesinde Ulttyq qorǵa jarmasa berýdi doǵarý qajettigin basa aıtty, dep habarlaıdy QazAqparat tilshisi.

«Ulttyq qorǵa jarmasa berýdi doǵarý qajet. Men bul týraly osyǵan deıin de talaı ret aıttym. Ulttyq qor – bolashaq urpaqtyń qarajaty. Biz onyń resýrstaryn tek qajetti jaǵdaılarda, daǵdarys kezeńderinde paıdalanýymyz kerek. Memlekettik-jekeshelik áriptestik jáne jan basyna shaqqandaǵy qarjylandyrý ınstıtýtyn, ásirese áleýmettik ınfraqurylymǵa ınvestıtsııalar tartý úshin tolyq kólemde paıdalaný qajet.

Ótken jyldyń jeltoqsan aıynda memlekettik-jekeshelik áriptestiktiń jańa modelin engizýge baǵyttalǵan zańnamalyq túzetýlerge qol qoıdym. Jeke áriptesterdi irikteý rásimderiniń ashyqtyǵyn qamtamasyz etý úshin sharalar qabyldandy, kvazımemlekettik kásiporyndardyń qatysýy shekteldi», - dedi Qasym-Jomart Toqaev.

Aıtýynsha, bul sharalar bıznesti memlekettik jobalardy iske asyrýǵa tartýǵa múmkindik beredi.

«Bul qural jańa ulttyq jobalardy iske asyrý kezinde barynsha paıdalanylýy tıis. Úkimetke áleýmettik salada memlekettik-jekeshelik áriptestiktiń keshendi baǵdarlamasyn daıyndaýdy tapsyramyn», - dedi Memleket basshysy.

Aıta keteıik, Úkimet úıinde Prezıdent tóraǵalyǵymen eldiń áleýmettik-ekonomıkalyq damý máseleleri jóninde keńes ótip jatyr.