Áleýmettik salada shuǵyl qarjylandyrylatyn jekelegen máseleler sheshiledi – Senat
Naqtylaýdyń negizgi mindetteri - áleýmettik salada shuǵyl qarjylandyrylatyn jekelegen máselelerdi sheshý, keıingi jyldarda ekonomıkanyń ósýi úshin qosymsha kózder jasaý jáne 2019 jyldyń sońyna deıin Úkimettiń kezek kúttirmeıtin mindetterge arnalǵan rezerviniń aqylǵa qonymdy deńgeıin qamtamasyz etý.
«Zań jobasy 2019 jylǵa arnalǵan eldiń áleýmettik-ekonomıkalyq damý boljamynyń kórsetkishteri saqtala otyryp, qalyptastyryldy. Respýblıkalyq bıýdjettiń túsimderi 94,9 mlrd teńgege ulǵaıtyldy. Respýblıkalyq bıýdjet shyǵystarynyń kólemi 94,9 mlrd teńgege ulǵaıtyldy. Respýblıkalyq bıýdjettiń tapshylyǵy buryn bekitilgen jalpy ishki ónimniń 2,1 paıyzy deńgeıinde saqtaldy», - dedi QR Premer-Mınıstriniń birinshi orynbasary-Qarjy mınıstri Álıhan Smaıylov.
Atap aıtqanda, áleýmettik saladaǵy shuǵyl qarjylandyrý máselelerin sheshý maqsatynda áleýmettik bloktyń shyǵystary 6,7 mlrd teńgege ulǵaıtyldy. Shyǵystardy qaıta bólýdi eskere otyryp, qosymsha qarajat ataýly áleýmettik kómekti tóleýge, medıtsınalyq kómek kórsetýge jáne densaýlyq saqtaý nysandarynyń qurylysyn jalǵastyrýǵa baǵyttaldy.
Sonymen qatar, naqty sektordyń shyǵystary 15,6 mlrd teńgege ósti. Bıýdjettik baǵdarlamalar ákimshileri usynǵan qarajatty qaıta bólýdi eskere otyryp, ónerkásipti qoldaýǵa, «Qazaqstan turǵyn úı qurylys jınaq bankiniń» salymshylaryna turǵyn úı qaryzdaryn berýge qosymsha shyǵystar kózdeldi.
«Zań jobasyn daıyndaý kezinde jekelegen memlekettik organdardy qaıta uıymdastyrýyn eskere otyryp, shyǵystardy túzetý qamtylǵan. Munymen qosa, azamattyq qyzmetshilerdiń eńbekaqysyn arttyrýǵa, jylý energetıkasy men kólik ınfraqurylymyn damytýǵa, «Nurly jer» baǵdarlamasy sheńberinde turǵyn úı jáne ınjenerlik-kommýnıkatsııalyq ınfraqurylym salýǵa naqty qajettiligin eskere otyryp, óńirler arasynda qarajat qaıta bólý eskerilgen», - dedi Á. Smaıylov.
Óz kezeginde QR Ulttyq ekonomıka mınıstri Rýslan Dálenov 2019 jylǵa arnalǵan respýblıkalyq bıýdjetti naqtylaý kezinde eldiń áleýmettik-ekonomıkalyq damý boljamynyń negizgi kórsetkishteri saqtalǵanyn quptady.
«Jalpy ishki ónimniń ósýi 3,8 paıyz deńgeıinde, munaı óndirý 89 mln tonna kóleminde. Munaıdyń álemdik baǵasy joǵary qubylmalylyqty kórsetip otyr. Osyny eskere otyryp, munaıdyń boljamdy baǵasy barreline 55 AQSh dollary deńgeıinde saqtaldy», - dedi mınıstr.
Onyń atap ótýinshe, jyldyq ınflıatsııanyń nysanaly dálizi 4-6 paıyz sheginde tur.
«Jalpy, respýblıkalyq bıýdjettiń kiristeri (transfertterdi esepke almaǵanda) 2019 jyly 7 trln 81 mlrd teńgeni quraıdy. Túsimder túrleri boıynsha kirister qurylymy saqtalady. Kólemdi túsimderdi qosylǵan qun salyǵy (2,8 trln teńge), korporatıvtik tabys salyǵy (2 trln teńge), halyqaralyq saýdaǵa salynatyn salyqtar (1,5 trln teńge) qamtydy», - dedi Rýslan Dálenov.
Túsimderdiń jalpy kólemi 95 mlrd teńgege ósip, 10,7 trln teńgeni quramaq. Transfertterdiń túsimderi, onyń ishinde Ulttyq qordan transfertter óspeıdi. Shyǵystar 95 mlrd teńgege artady, bul kiristerdiń ósýimen sáıkes keledi. Respýblıkalyq bıýdjet shyǵystarynyń kólemi 12 trln teńgeden asady.