Áleýmettik saqtandyrý júıesi 6,3 mln-nan astam qazaqstandyqty qamtıdy

NUR-SULTAN. QazAqparat - Búgingi tańda elimizde 6,3 mln-nan astam adam mindetti áleýmettik saqtandyrý júıesiniń qatysýshysy, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

«Memlekettik áleýmettik saqtandyrý qory» AQ-nan 2005-2019 jyldary 4,6 mln adam jalpy somasy 1,2 trln teńgeden astam áleýmettik tólem aldy.

«Áleýmettik saqtandyrý – jumys isteıtin azamattar úshin áleýmettik qamsyzdandyrýdyń qosymsha nysany. 2019 jyly mindetti áleýmettik saqtandyrý júıesi týraly halyqtyń habardarlyǵyn arttyrý maqsatynda Memlekettik áleýmettik saqtandyrý qorynyń 17 fılıalynda 68 ashyq esik kúni ótkizildi», delingen habarlamada.

Ótken aptada analarǵa jáne bolashaq analarǵa arnalǵan sheberlik sabaǵy formatyndaǵy sońǵy is-sharalar ótti. Oǵan MÁSQ, «Azamattarǵa arnalǵan úkimet» memlekettik korporatsııasy mamandary, sondaı-aq medıtsınalyq ortalyqtardyń ókilderi, tulǵalyq ósýdiń koých-trenerleri qatysty.

Áleýmettik saqtandyrý júıesine qatysýshylarǵa birqatar aqparattyq jáne konsýltatsııalyq qyzmet usyný jáne qor usynatyn elektrondyq memlekettik qyzmetterdi keńinen taratý maqsatynda ashyq esik kúnderi ótkizildi.

Áıelderge 1 jasqa deıingi balany kútip-baǵý úshin áleýmettik tólemdi proaktıvti formatta tóleý múmkindigi týraly aıtyldy, munda tólem jasaý maqsaty týraly áleýmettik qorǵaý organdarynyń SMS-habarlamasyna jaýap berip, bank shoty týraly aqparatty jiberý kerek. Bıylǵy jyldyń 11 aıynda osy qyzmet boıynsha 13 246 adamǵa tólem somasy taǵaıyndalǵan.

Sonymen qatar, 2019 jyly mindetti áleýmettik saqtandyrý júıesi týraly aqparattandyrý maqsatynda halyqpen 1280 aqparattyq túsindirý kezdesýi ótkizilip, oǵan 46 304 azamat qatysty.