Áleýmettik osal toptarǵa beriletin járdemaqy somasy ulǵaıtylmaq

ASTANA. QazAqparat – Áleýmettik osal toptarǵa beriletin járdemaqylardyń somasyn kóbeıtý eskerilip otyr. Bul týraly Senattyń jalpy otyrysynda QR Áleýmettik kodeksiniń jobasy men ilespe zań jobalaryn birinshi oqylymda talqylaý kezinde QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Kodekstiń kelesi jańalyǵy – ataýly áleýmettik qoldaýdy kúsheıtý.

Oǵan sáıkes memlekettik qoldaý aldymen áleýmettik syn-qaterdiń aldyn alatyn ataýly shara retinde qaralastyrylyp, odan keıin ǵana ataýly áleýmettik kómek retinde eskeriledi. Bul rette, 2 máselege basa nazar aýdarǵym keledi. Birinshiden, ataýly sharalar tsıfrlyq karta negizinde anyqtalyp, otbasynyń statýsyna qaraı iske asyrylatyn bolady. Osy oraıda tsıfrly kartadan kópbalaly otbasylardyń túrli áleýmettik syn-qaterge tap bolýy yqtımaldyǵy joǵary ekendigin kórdik. Sondyqtan balaly otbasylardy áleýmettik qoldaýdyń qoldanystaǵy júıesin saqtaı otyryp, balalardy qorǵaýdyń qosymsha ataýly sharalary qarastyryldy», - dedi T. Dúısenova.

Osy oraıda Áleýmettik kodekste balalary bar otbasylardy áleýmettik qoldaýdyń qosymsha sharalary retinde myna qadamdar eskerilgen:

- bala kútimi boıynsha tólemderdiń merzimin 1,5 jasqa deıin uzartý;

- kópbalaly analarǵa beriletin járdemaqy somasyn saralaý jáne olarǵa nagradtalǵan ana degen jańa mártebe berý;

- áleýmettik osal toptarǵa beriletin járdemaqylardyń somasyn kóbeıtý.

«Taǵy bir mańyzdy ózgeris – ataýly áleýmettik kómek berý úshin kedeılik shegi búgingi kúnkóris deńgeıiniń ornyna medıandyq tabys deńgeıi arqyly anyqtalady. Bul rette Ekonomıkalyq yntymaqtastyq jáne damý uıymynyń tájirıbesi zerdelendi. Osy uıymǵa kiretin 8 memleket osy tásildi paıdalanyp keledi. Búginde AQSh-taǵy kedeılik shegi medıanalyq kiristiń 40 paıyzyna, Kanadada - 50, al Eýralyq odaq elderine kiretin keıbir memleketterde 60 paıyzyna para-par. Biz de osy tájirıbeni 2025 jyldan bastap engizýdi kózdep otyrmyz», – dedi Tamara Dúısenova.

Budan buryn habarlanǵandaı, Áleýmettik kodeks jobasynda qaǵaz qujattar júıeden shyǵaryp, járdemaqylardy proaktıvti formatta bekitý eskerilgen.