Áleýmettik medıtsınalyq saqtandyrý qoryndaǵy tólemder somasy 113,8 mlrd teńgege jetti

ASTANA. QazAqparat - Qazaqstanda 2017 jyldyń 1 shildesinen 2018 jyldyń 31 qazanyna deıin «Áleýmettik medıtsınalyq saqtandyrý qoryna» UAQ  (ÁMSQ) túsken tólemderdiń jalpy somasy 113,8 mlrd teńgeni quraǵan, dep habarlaıdy QazAqparat tilshisi qordyń baspasóz qyzmetine silteme jasap.

Atap aıtqanda, onyń 105,2 mlrd teńgesi (92,4%) jumys berýshilerdiń aýdarymdary bolsa, qalǵan 8,6 mlrd teńge (7,6%) - jeke kásipkerler men azamattyq-quqyqtyq kelisimshart negizinde eńbek etetin tulǵalarǵa tıesili.

Aımaqtyq turǵydan alǵanda, jarna tóleý jaǵynan burynǵysha Almaty, Astana qalalary men Qaraǵandy oblysy kósh bastap tur.

Atap ótilgendeı, jınaqtalǵan qarjy Ulttyq bankte saqtalady. Bolashaqta MÁMS paketi sheńberindegi qyzmetter aqysyn tóleýge jumsalady. Elimizdiń bas bankimen qarjyny senimgerlik basqarý týraly kelisim bekitilgen.