Áleýmettik medıtsınalyq saqtandyrý: Kim tisin tegin emdete alady

QARAǴANDY. QazAqparat – Áleýmettik medıtsınalyq saqtandyrý júıesi boıynsha tegin stomatologııalyq kómekti kimder ala alady? Bul týraly Medıtsınalyq saqtandyrý qory Qaraǵandy oblystyq fılıalynyń mamandary aıtyp berdi, dep habarlaıdy QazAqparat tilshisi.

Shuǵyl stomatologııalyq kómekti kelesi sanattaǵy azamattar ala alady:

- 18 jasqa deıingi balalar;

- júkti áıelder;

- UOS qatysýshylary;

- 1,2,3 jáne 4 toptaǵy múgedekter;

- «Altyn alqa» jáne «Kúmis alqa» alǵan analar;

- ataýly áleýmettik kómek alýshylar;

- zeınetkerler (jasy boıynsha);

- ınfektsııalyq, áleýmettik mańyzy bar aýrýlarmen aýyratyn naýqastar.

«Shuǵyl stomatologııalyq kómekke jiti aýyrsyný jaǵdaılary jatady. Kómek hımııalyq qataıý kompozıttik materıaldarynan jasalǵan jansyzdandyrý, preparattaý jáne plomba salý, jansyzdandyrý arqyly tisti julyp tastaý, perıostotomııa, abstsessterdi ashý jatady», - dep túsindirdi Medıtsınalyq saqtandyrý qorynyń Qaraǵandy fılıaly bóliminiń bas sarapshysy Janar Rakısheva.

Josparly tegin stomatologııalyq kómekti (ortodontıkalyq jáne ortopedııalyq kómekten basqa) dárigerdiń joldamasy boıynsha 18 jasqa deıingi balalar men júkti áıelder ala alady.