Áleýmettik máselelerde memleket – qoǵam – bıznes arasyndaǵy áriptestikke zor senim júktelip otyr – mınıstr

NUR-SULTAN. QazAqparat – Qoǵamnyń áleýmettik-mańyzdy máselelerin sheshýde memleket – qoǵam – bıznes ókilderi arasyndaǵy áriptestikke artylar senim zor. Bul týraly Aqparat jáne qoǵamdyq damý mınıstri Aıda Balaeva málim etti, dep habarlaıdy QazAqparat tilshisi.

«Prezıdentimiz Táýelsizdiktiń 30 jyldyǵyn keń kólemde atap ótýde halyq birligin arttyryp, eldi uıystyrýǵa arnalǵan izgi jobalarǵa basymdyq berýge shaqyrǵan. Bul – ıgiligi zor, qaıyrymy mol izgi shara. Oǵan azamattyq sektor men bıznes-qaýymdastyq ókilderiniń, memlekettik organdar men barsha belsendi azamattardyń qatysýy óte mańyzdy», - dedi mınıstr «Qaıyrymdy ister» marafonynyń bastalýyna arnalǵan is-sharada.

Osy oraıda ol qaıyrymdylyq pen donorlyq qyzmettiń odan ary damytý baǵytynda naqty usynystar kerektigin atap ótti.

«Sebebi qoǵamnyń áleýmettik-mańyzdy máselelerin sheshýde memleket – qoǵam – bıznes ókilderi arasyndaǵy áriptestikke artylar senim zor. Sonyń ishinde, ásirese, úkimettik emes uıymdarǵa basa mán berýdemiz. Bul oraıda, biz bul izgi jobaǵa nıet bildirgen barlyq azamattar úshin – arnaıy áleýmettik jáne ekonomıkalyq sharalar qabyldaý arqyly – bul úrdisti odan ary yntalandyrýdy qarastyryp otyrmyz.

Sondyqtan búgingi sharada, sizderdiń taraptaryńyzdan utymdy oı-pikirler, qaıyrymdylyq pen donorlyq qyzmetti odan ary damytý baǵytynda naqty usynystar men jobalar kútemiz», - dedi A. Balaeva.

Budan buryn habarlanǵandaı, búgin elordada donorlar men metsenattardyń qatysýymen «Qaıyrymdy ister marafony» bastaldy.

Aıta keteıik, «Qaıyrymdy ister marafony» bastamasyn Memleket basshysy Qasym-Jomart Toqaev kótergen bolatyn.