Áleýmettik mańyzy bar azyq-túlikterdiń qymbattaǵanyn habarlaýǵa bolatyn portal qurylady

NUR-SULTAN. QazAqparat- QR Saýda jáne ıntegratsııa mınıstrligi azyq-túlik baǵalarynyń turaqtylyǵyn saqtaý maqsatynda azamattardy belsendi bolýǵa shaqyrady, dep habarlaıdy QazAqparat tilshisi.

Aldaǵy ýaqytta áleýmettik mańyzy bar taýarlardyń baǵalary kórsetilgen fotosýretterdi kez kelgen azamat jibere alatyn arnaıy saıt qurylatyn bolady.

«Búgingi kúnde Statıstıka komıteti apta saıyn (ár seısenbi kúni) áleýmettik mańyzy bar azyq-túlik taýarlarynyń baǵalaryn taldaıdy. Resmı statıstıkalyq derekter ár beısenbi kúni jarııalanady. Derekter jınaý 2011 jyldan bastap qolǵa alynǵan. Jalpy damyǵan elderde baǵany monıtorıngileýge halyq tartyldy. Sol sekildi bizde de kez kelgen azamat taýar baǵasyn sýretke túsirip ony áleýmettik mańyzy bar azyq-túlik taýarlarynyń baǵalar statıstıkasy jınaqtalatyn mamandyrylǵan saıtqa jibere alady», - dedi QR Saýda jáne ıntegratsııa mınıstri Baqyt Sultanov.

Mınıstrdiń aıtýynsha, atalǵan júıe arqyly naqty dúkenderdegi áleýmettik mańyzy bar azyq-túlik taýarlarynyń baǵasyn onlaın rejimde baqylaýǵa bolady.

«Halyq belsendi qoldaýy bolǵan jaǵdaıda, biz bul júıeni qurýǵa jáne oǵan barlyq múddeli memlekettik organdar men uıymdardy qosýǵa daıynbyz», - dedi mınıstr.