Áleýmettik mańyzy bar azyq-túlik taýarlary 2,4 paıyzǵa qymbattady

NUR-SULTAN. QazAqparat – Eksporttyq aýyl sharýashylyǵy ónimderiniń de óndirisin arttyrý qajet. Bul týraly Úkimet otyrysynda QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«23 aqpandaǵy jaǵdaı boıynsha áleýmettik mańyzy bar azyq-túlik taýarlary baǵalarynyń ósýi 2,4 paıyz deńgeıinde tirkeldi. Bárinen buryn ımportqa táýeldi ónimderdiń, joǵary eksporttyq suranysy bar taýarlardyń, sondaı-aq maýsymaralyq kezeńde dástúrli túrde qymbattaıtyn kókónisterdiń baǵalary ósim kórsetti. Olardyń jalpy ósimge qosqan úlesi 2 paıyzdyq tarmaqty qurady», - dedi agroónerkásiptik keshendi damytýdyń negizgi baǵyttary jáne ınvestıtsııalyq jobalardyń iske asyrylýy týraly baıandaǵan Baqyt Sultanov.

Onyń atap ótýinshe, azyq-túlik taýarlarynyń baǵasy óndiris pen tutyný teńgerimine ǵana emes, sondaı-aq ımporttalatyn jáne eksportqa jiberiletin ónimniń úlesine de baılanysty. Mundaı aǵyndar syrtqy naryqtardyń baǵalaryn ishki saýdaǵa da áser etkizedi.

«Aýyl sharýashylyǵy mınıstrligi óńirlik atqarýshy organdarmen birlesip, ımportqa táýeldi taýarlar boıynsha ǵana emes, sondaı-aq eksporttyń joǵary úlesi baıqalatyn ónimder boıynsha da óndiristi barynsha ulǵaıtýy qajet», dedi mınıstr.