Áleýmettik mańyzy bar azyq-túlik ónimderiniń baǵasy 3,2 paıyzǵa ósti – Baqyt Sultanov
«Bıyldyń basynan áleýmettik mańyzy bar azyq-túlik ónimderiniń baǵasy 3,2 paıyzǵa ósti. Bul rette, ótken jyldyń uqsas kezeńinde baǵalar 4,8 paıyzǵa qymbattady. Ósimniń 4,1 protsenttik pýnkti karantındik dúrlikpe saldarynan naýryz aıynda baıqaldy. Qabyldanǵan jedel is-sharalardyń nátıjesinde baǵalardyń ózgerýi turaqtandy. Sońǵy úsh aptada ósim 0,2 paıyzdy qurady», - dedi mınıstr Úkimet otyrysynda.
Onyń aıtýynsha, baǵanyń odan ári ósýine jol bermeý maqsatynda bıylǵy 11 naýryzda QR Úkimetiniń otyrysynda 45 is-sharadan quraıtyn Baǵany turaqtandyrý jónindegi jol kartasy maquldandy. Jol kartasyn oryndaý aıasynda naýryzda jedel sharalar qabyldandy.
«Sonymen qatar, keıbir óńirlerde áli kúnge deıin joǵary ósim baıqalady. 6 sáýirdegi jaǵdaı boıynsha eń joǵarǵy baǵa ósimi Jambyl oblysynda (4,2%) jáne Atyraý oblysynda (3,8%) oryn aldy. Eń az 2,9 paıyzǵa ósim Shyǵys Qazaqstan jáne Aqmola oblystarynda tirkeldi», - dedi B. Sultanov.
Budan buryn habarlanǵandaı, QR Premer-Mınıstriniń birinshi orynbasary Álıhan Smaıylov Atyraý men Jambyl oblystarynda áleýmettik mańyzy bar azyq-túlik baǵasy qymbattap ketkenin aıtty.
Óz kezeginde Úkimet basshysy Asqar Mamın baǵalarynyń ósýine jol bergeni úshin Atyraý jáne Jambyl oblystary ákimderiniń jaýapty orynbasarlaryna qatań sógis jarııalaý jónindegi usynysqa qoldaý bildirdi.