Áleýmettik mańyzy bar azyq-túlik baǵasy bir jylda 9,6% qymbattady

ASTANA. QazAqparat – Áleýmettik mańyzy bar azyq-túlik taýarlarynyń baǵa ındeksi ótken aptada ózgerissiz qaldy, al jyldyq mánde 9,6% ósti. QazAqparat bul týraly Ulttyq statıstıka bıýrosyna silteme jasap habarlaıdy.

13 maýsymdaǵy jaǵdaı boıynsha, áleýmettik mańyzy bar keıbir taýarlardyń eldegi ortasha baǵasy: kúrish – bir kelisi úshin 431 teńge, makaron ónimi – kelisi úshin 314 teńge, qyryqqabat – kelisi úshin 138 teńge.

Aıta keteıik, áleýmettik mańyzy bar azyq-túlik taýarlarynyń tizbesine 19 ataý kiredi. Baǵa ózgerisi týraly kórsetkishter apta saıyn jańaryp otyrady. Baǵanyń ózgerýi týraly aqparat barlyq oblys ortalyǵynan, respýblıkalyq mańyzy bar qalalardan jáne astanadan jınalady. Ol úshin eldi mekenniń ártúrli bólikterinde ornalasqan taýarlardyń keń assortımenti bar ártúrli tıptegi saýda obektileri (gıpermarketter, sýpermarketter, dúkender, kommýnaldyq bazarlar, áleýmettik dúkender men pavılondar) tańdalady.