Áleýmettik mańyzdaǵy ister birinshi kezekte qaralady – Ádilet mınıstrligi

NUR-SULTAN. QazAqparat – Jeke sot oryndaýshylary áleýmettik mańyzy bar sanattaǵy isterdi birinshi kezekte qarastyrady. Bul týraly Ádilet mınıstri Marat Beketaev halyq aldynda esep berý kezinde málim etti, dep habarlaıdyQazAqparat.

Mınıstrdiń atap ótýinshe, Atqarýshylyq is júrgizý týraly zańda atqarýshylyq is júrgizýdi jetildirýge, isterdiń áleýmettik-mańyzdy sanattaryn oryndaýdyń basymdylyǵyn qamtamasyz etý boıynsha jeke sot oryndaýshylary jáne palatalardyń qyzmetin uıymdastyrýǵa baǵyttalǵan ózgerister qarastyrylǵan.

Sonymen qatar tıisti zań boıynsha ýákiletti organnyń (QR Ádilet mınıstrligi) baqylaýy jáne prokýratýra tarapynan qadaǵalaýy kúsheıtildi. Bul jeke sot oryndaýshylarynyń jaýapkershiligin arttyrýǵa yqpal etedi.

M. Beketaevtyń sózine qaraǵanda, jańa zańda shekteý sharalaryn alyp tastaý tártibin, onyń ishinde óndirip alýshynyń ótinishi boıynsha qaıtarylǵan atqarýshylyq qujattar boıynsha reglamentteý, sondaı-aq olqylyqtar men kollızııalardy joıý kózdelgen.

Atqarýshylyq is júrgizý týraly zańdy Parlament qabyldady, endi Prezıdenttiń qaraýyna usynylady.