Áleýmettik qyzmetter portaly arqyly 14,7 myńnan astam ońaltýdyń tehnıkalyq quraly berildi

NUR-SULTAN. QazAqparat - Áleýmettik qyzmetter portalyn (ári qaraı – portal) iske qosqan aǵymdaǵy jyldyń basynan beri, ol arqyly múgedektigi bar adamdar úshin 14 723 ońaltýdyń tehnıkalyq quraly (ári qaraı – OTQ) berildi, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

Portal múgedektigi bar adamdarǵa OTQ óndirýshi men jetkizýshini óz betinshe tańdaýǵa múmkindik beredi. Kómektiń kepildik berilgen túrine tapsyrys berý elektrondyq tsıfrlyq qoltańba arqyly júzege asyrylady. Tapsyrys berilgen OTQ-ny jetkizý arqyly nemese óz betinshe alyp ketýge bolady.

Qazirgi ýaqytta portalda OTQ-nyń 55 túriniń 24-i qoljetimdi. Qazan aıynda pılottyq tártipte portal arqyly jeke kómekshiler men ymdaý tili mamandarynyń qyzmetterine tapsyrys berý, sondaı-aq shıpajaılyq emdelý uıymyn tańdaý múmkindikteri iske qosylatyn bolady. OTQ-nyń qalǵan túrleri 2021 jyly portalǵa aýystyrylatyn bolady.

Múgedektigi bar adamdardy ońaltý quraldarymen qamtamasyz etý protezdik-ortopedııalyq, sýrdotehnıkalyq, tıflotehnıkalyq jáne gıgıenalyq quraldardy, sondaı-aq kreslo-arbalardy usynýdy qamtıdy.

Eske sala keteıik, elektrondyq resýrs múgedektigi bar adamdardy qajetti qyzmettermen jáne jetkizýshiden tikeleı OTQ-men qamtamasyz etý maqsatynda ázirlengen. Búgingi tańda portalda 5 748 múgedektigi bar adam jáne «Qamqorshy» mártebesine ıe 5 216 adam bolǵan.

Qazirgi ýaqytta portalda 733 jetkizýshi tirkelgen, onyń 25-i OTQ usynady. 708 uıym arnaıy áleýmettik qyzmetter kórsetetin bolady. Mınıstrlik jetkizýshilerdiń sanyn arttyrý boıynsha belsendi jumys júrgizýde.

«Áleýmettik qyzmetter portaly» avtomattandyrylǵan aqparattyq júıesin engizý Múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospar sheńberinde kózdelgen.

Portaldy paıdalaný boıynsha keńesti 1411 nómiri boıynsha koll-ortalyqtan alýǵa bolady.