Áleýmettik quqyqtardy saqtaý boıynsha jańa mehanızmder qarastyrylady – Eńbek mınıstri

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Tamara Dúısenova eńbek naryǵyn modernızatsııalaý jumystary týraly aıtyp berdi, dep habarlaıdy QazAqparat tilshisi.

«Eńbek naryǵyn modernızatsııalaýda ózin-ózi jumyspen qamtý jáne platformalyq jumys rejımderin taný, ony zańdastyrý arqyly azamattarǵa yńǵaıly rejımdi saqtaý, eńbek jáne áleýmettik quqyqtardy saqtaý boıynsha jańa mehanızmder qarastyrylady. Maqsatty topqa kiretin azamattardy birinshiden, memleket tarapynan sýbsıdııalanatyn jumys ornyna tartý, ekinshiden, áleýmettik tapsyryspen jumys isteıtin memlekettik emes jáne qoǵamdyq uıymdar aıasyn keńeıtý arqyly áleýmettik jumys oryndaryn ashý qarastyrylady», - dedi mınıstr Úkimet úıinde ótken otyrysta.

Onyń aıtýynsha, jumys kúshiniń utqyrlyǵyn qamtamasyz etý maqsatynda ishki jáne syrtqy kóshi-qon máselelerinde jańa mehanızmder usynylady. Azamattardyń kásibı daǵdylaryn arttyrý úshin jappaı oqytý mehanızmderi belgilenip, bul jaýapkershilik memleket, jumys berýshi jáne qyzmetker arasynda bólinedi.

«Jumyspen qamtý máselesi tolyq tsıfrlandyrylady, jumys izdeý nemese jumysshy izdeý tek elektrondy bırja arqyly júrgiziledi. Kóshi-qon saıasaty jónindegi tujyrymdama jobasy da ázirlenip jatyr. Onda Prezıdenttiń qandastar boıynsha tapsyrmalary tolyq qaralady, joba jyl sońyna deıin Úkimetke bekitýge beriledi», - dedi Tamara Dúısenova.

Buǵan deıin Eńbek mınıstri 2023 jyly áleýmettik tólemder proaktıvti túrde beriletinin aıtqan edi.

Foto: www.sports.kz