Áleýmettik korporatsııalar shyǵynǵa batsa da eńbekaqy tóleý qoryn únemi ulǵaıtyp otyrǵan

ASTANA. QazAqparat – Áleýmettik kásipkerlik korporatsııalar shyǵynǵa batsa da eńbekaqy tóleý qorlary únemi ulǵaıyp otyrǵan. Bul týraly Májilis depýtattarynyń saýalyna QR Sybaılas jemqorlyqqa qarsy is-qımyl agenttiginiń tóraǵasy Oljas Bektenovtiń jaýabynda aıtylǵan.

«Kóptegen ÁKK shyǵyndylyǵyna qaramastan jyl saıyn eńbekaqy tóleý qoryn jáne kútip-ustaý jónindegi shyǵystardy ulǵaıtady. Atap aıtqanda, ÁKK jıyntyq shyǵyny («Kokshe», «Aqtóbe», «Atyraý», «Kaspıı», «Taraz», «Aqjaiyq», «Soltústik», «Saryarqa», «Astana» jáne «Pavlodar» ÁKK-de belgilengen) shamamen, 17,4 mlrd teńgeni qurady. Bul rette, eńbekaqy tóleý qory, onyń ishinde basshy býynǵa 3 jylda 1 mlrd teńgege (952 mln teńge) ulǵaıdy. Mysalǵa, «Soltústik» ÁKK-de basqarma tóraǵasy men qyzmetkerlerdiń jalaqysy 712 mln teńge shyǵyn kezinde 2 esege artty», - dep atap ótedi Oljas Bektenov.

Onyń dereginshe, ÁKK («Aqtóbe», «Jetisý» ÁKK) bıznes-bastamalardy qoldaýdyń jáne ekonomıkalyq belsendilikti yntalandyrýdyń ornyna korporatıvtik qorlarǵa, túrli kompanııalarǵa jeńildikti qaryzdar berý túrinde qarjylyq kómek kórsetedi.

«Máselen, 2019-2021 jyldary «Jetisý» ÁKK basshylyǵy «Aqsý qant» JShS-syna 3,3 mlrd teńge mólsherinde paıyzsyz qarjylyq kómek kórsetti. Onyń 2,7 mlrd teńgesi shart boıynsha merziminde qaıtarylmady. Qaıtarylmaǵan qarajattyń jalpy somasy shamamen 3 mlrd teńgeni qurady», - dedi agenttik basshysy.