Áleýmettik kómek kórsetýdiń jańa ádisine 7 mlrd. teńge bólindi
Bul týraly búgin baspasóz máslıhaty kezinde QR Eńbek jáne áleýmettik qorǵaý vıtse-mınıstri Svetlana Jaqypova málim etti, dep habarlaıdy QazAqparat.
Onyń sózine qaraǵanda, 2014 jyly áleýmettik kómek kórsetýdiń jańa ádisi Aqmola, Shyǵys Qazaqstan jáne Jambyl oblystarynda engizildi. Áleýmettik kómek kórsetý boıynsha qolǵa alynǵan «Órleý» ilki jobasynyń aıasynda, atalmysh oblystarda jaǵdaı tómen otbasylarmen áleýmettik kelisimshart jasaldy.
2015 jyldyń ekinshi jartyjyldyǵynan bastap, bul joba taǵy 38 aýdan men qalalarda engizilgen bolatyn. Osylaısha, 2015 jyly «Órleý» jobasyna 20,2 myń adam qatysty.
«2016 jyly «Órleý» jobasyna 38,8 myń adam qatysty. Jobany júzege asyrýdyń arqasynda oǵan qatysqan adamdardyń jan basyna shaqqandaǵy kirisi 2 esege astam ósken. Eńbekke jaramdy azamattardyń 90,5%-y jumyspen qamtý sharalaryna tartyldy», - dedi Svetlana Jaqypova.
Osynyń arqasynda atalmysh oblystarda áleýmettik kómek alýshylardyń sany 25 paıyzǵa kemigen.
Jobany ary qaraı júzege asyrý maqsatynda 2017 jyly respýblıkalyq bıýdjetten 7,1 mlrd teńge qarastyrylyp otyr. Bıyl áleýmettik kómek kórsetý boıynsha qolǵa alynǵan «Órleý» ilki jobasynyń aıasynda elimizdiń qalalary men aýdandarynda turyp jatqan jaǵdaı tómen 150 myńǵa tarta adam qamtylady dep kútilýde.