Áleýmettik kómek: Azyq-túlik sebetteriniń quramy men kólemine ózgerister engizildi
Vedomostvonyń habarlaýynsha, osy jyldyń qazan aıynan bastap barlyq aımaqtarda Portal arqyly áleýmettik toptamamen qamtamasyz etý is-qımyly pılottyq rejımde qolǵa alyndy. Osylaısha, 3,5 myńǵa jýyq azamat jyl sońyna deıin qyzmetti proaktıvti túrde ala alady.
QR Eńbek jáne halyqty áleýmettik qorǵaý vıtse-mınıstri Erlan Áýkenov osy jyldyń 1 jeltoqsanyna deıin qalalyq jáne aýdandyq deńgeıde jetkizýshilerdi Portalda akkredıtteý úshin komıssııa qurylatyny týraly aıtty
Qazirgi ýaqytta qyzmet alýshylardy elektrondy-tsıfrly qoltańba kiltterimen qamtamasyz etý boıynsha jumys júrgizilýde. Jumyspen qamtý ortalyqtary bolsa, Portalmen qalaı jumys jasaý kerektigin túsindiredi.
Osy jyldyń qyrkúıek aıynda azyq-túlik sebetteriniń quramy men kólemine ózgerister engizildi. Atap aıtqanda, azyq-túlik jıyntyǵy saqtaý merzimin uzartý úshin ýltrapasterlengen sútpen tolyqtyryldy. Qaraqumyq jarmasynyń maýsymdyq jetispeýshiligine baılanysty kúrish túrinde balama nusqa qarastyryldy.
Sondaı-aq, balalarǵa arnalǵan jemis-jıdek pen kókónis pıýresi biriktirilip, osylaısha bala ózine unaǵan ónimdi tańdaı alady.
Osy jyly, Eńbek mınıstrligi halyqtyń áleýmettik osal sanattaryna, sonyń ishinde ataýly áleýmettik kómek alatyn mektep jasyndaǵy balalarǵa qosymsha kómek kórsetkenin aıtty.
Bıylǵy naýryz aıynan bastap jáne tótenshe jaǵdaı men karantındik shekteý sharalarynyń barlyq kezeńinde, 2 aılyq eseptik kórsetkish mólsherinde, azyq-túlik jıyntyqtaryn satyp alý úshin aı saıynǵy aqshalaı tólem júrgizildi.
Naýryzdan mamyrǵa deıin jáne shildeden tamyzǵa deıingi aralyqta osy maqsattarǵa 1 mıllıonnan astam adamǵa bıýdjetten 25,6 mıllıard teńge bólindi. Onyń ishinde 200 myńnan astam bala tólemmen qamtyldy.
Sonymen qatar, osy kezeńde, mektep jasyna deıingi balalarǵa arnalǵan áleýmettik toptama sheńberinde zattaı kómek kórsetý jalǵasyn tapty.