Áleýmettik kodekstegi jańashyldyq: Mansap ortalyqtary nemen aınalysady

ASTANA. QazAqparat – 1 shildede QR Áleýmettik kodeksi kúshine endi. Onda kózdelgen jumyspen qamtýǵa járdemdesý sharalaryn iske asyrý maqsatynda Qazaqstandaǵy Halyqty jumyspen qamtý ortalyqtary Eńbek mobıldiligi ortalyqtaryna aınaldy, dep habarlaıdy QazAqparat.

Astana qalasynyń Eńbek mobıldiligi ortalyǵy óz qyzmetin qala aýdandarynyń (Almaty, Baıqońyr, Esil, Nura, Saryarqa) Mansap ortalyqtary arqyly júzege asyratyn bolady.

«Mansap ortalyqtary qala aýdandarynda jumyssyz adamǵa qyzmetterdiń neǵurlym tolyq spektryn usynatyn bolady. Bul tutastaı alǵanda keshendi jáne tıimdi tásil bolyp tabylady», - dep túsindirdi Astana qalasy ákimdiginiń Eńbek mobıldiligi ortalyǵynyń dırektory Oljas Omar.

«Eńbek mobıldiligi ortalyǵy» kommýnaldyq memlekettik mekemesiniń baspasóz qyzmetinen málim etkendeı, Mansap ortalyqtary kórsetetin qyzmetter:

AZAMATTAR ÚShІN

- Memlekettik granttar (400 AEK);

- «Urpaqtar kelisimsharty», «Alǵashqy jumys orny» jobalary;

- Múmkindigi shekteýli jandarǵa arnalǵan arnaıy jumys oryndary;

- Qolaıly bos jumys oryndaryn izdeý jáne jumysqa ornalasýǵa járdemdesý;

- Kásiptik oqytý, áleýmettik kásiptik baǵdarlaý;

- Áleýmettik jumys oryndary jáne qoǵamdyq jumystar;

- Jastar praktıkasy;

- Mıkrokredıt berý boıynsha konsýltatsııalar;

- Ataýly áleýmettik kómek.

JUMYS BERÝShІLER ÚShІN

- Jumys berýshiler úshin kadrlardy irikteý;

- Jumys berýshilerdiń suranysy boıynsha kásiptik oqytý;

- Jumys oryndaryn qurýdy sýbsıdııalaý.