Áleýmettik kodekske «masyldyq» uǵymy engizilýi múmkin

NUR-SULTAN. QazAqparat – Áleýmettik masyldyqqa boı aldyrǵan jalynsyz ómir salty jas urpaqtyń tárbıesine keri áser etip jatyr. Memleket basshysy Qasym-Jomart Toqaev óz Joldaýynda osyndaı másele kóterdi, dep habarlaıdy QazAqparat tilshisi.

«Taǵy bir máselege toqtalǵym keledi. Qazaqstan – áleýmettik memleket. Sondyqtan qıyn jaǵdaıǵa tap bolǵan azamattarǵa jan-jaqty kómek kórsetý – basty mindetterdiń biri. Alaıda qoǵamda paternalıstik kóńil-kúı jáne áleýmettik masyldyq úrdisi beleń alýda. El ishinde áleýmettik baǵdarlamalardy áli de jeke múddesine paıdalanatyn azamattar az emes. Mundaı adamdar kez kelgen órkenıetti eldegi sııaqty zańnyń jáne búkil qoǵamnyń aldynda jaýap berýi kerek. Osyndaı jaǵdaılar memleketten ala bersem degen kózqaras qalyptastyrdy», - dedi Preıdent.

Sondaı-aq, ol mundaı jaǵymsyz tendentsııanyń kesirinen kómekke shynymen muqtaj adamdar áleýmettik qoldaý sharalarynan tys qalyp jatqanyn atady.

«Árıne, bizdiń elimizdiń múmkindikteri zor. Biraq onyń da shegi bar. Eń bastysy, áleýmettik jeńildikke ıe bolsam degen orynsyz pıǵyl adamdy óz eńbegimen tabys tabý qabiletinen aıyrady. Mundaı jalynsyz ómir salty urpaq tárbıesine qazirdiń ózinde keri áser ete bastady. Sondyqtan bizge túbegeıli ózgeris kerek. Zań da, qoǵam da, adamdardyń sana-sezimi de ózgerýi tıis. Daıyndalyp jatqan Áleýmettik kodekste osyndaı máselelerge barynsha nazar aýdarý kerek», - dedi Qasym-Jomart Toqaev.