Áleýmettik kodeks qabyldanǵan jaǵdaıda birneshe zańnyń kúshi joıylady

ASTANA. QazAqparat – Búgin Senattyń jalpy otyrysynda QR Áleýmettik kodeksiniń jobasy men ilespe zań jobalary birinshi oqylymda maquldandy, dep habarlaıdy QazAqparat tilshisi.

Kodeks jobasy aıasynda azamattardyń áleýmettik quqyqtaryn júıeleý júzege asyryldy.

Qujatta mynadaı negizgi baǵyttar kórsetilgen:

1) balalary bar adamdardy (otbasylardy) áleýmettik qoldaý;

2) halyqty jumyspen qamtýǵa járdemdesý sharalary;

3) kedeılik sheginen tómen turatyn otbasylarǵa ataýly áleýmettik kómek;

4) arnaýly áleýmettik qyzmetter;

5) múgedektigi bar adamdardy áleýmettik qorǵaý;

6) zeınetaqymen qamsyzdandyrý;

7) azamattardyń jekelegen sanattaryn, onyń ishinde asyraýshysynan aıyrylǵandardy áleýmettik qoldaý.

«Qazirgi ýaqytta bul máseleler 9 derbes zańmen retteledi jáne Áleýmettik kodeks qabyldansa, olardyń kúshi joıylady. Bul rette jańa kodeks bıýdjetten de, memlekettik áleýmettik saqtandyrý qorynan da qazirgi kezde bar barlyq áleýmettik kepildikter men áleýmettik qoldaý nysandarynyń saqtalýyn qamtamasyz etedi», - delingen Senattyń Áleýmettik-mádenı damý jáne ǵylym komıtetiniń qorytyndysynda.

Kodeks jobasyn qabyldaýdan kómekke muqtaj azamattardyń jekelegen sanattarynyń ómir súrý sapasyn jaqsartý, olardyń áleýmettik qorǵalý dárejesin arttyrý, sondaı-aq olardyń ómir súrýine jáne qoǵamǵa kirigýine teń múmkindikter jasaý josparlanyp otyr.

QR Eńbek jáne halyqty áleýmettik qorǵaý mınıstri Tamara Dúısenovanyń aıtýynsha, Áleýmettik kodeksti ázirleý kezinde halyqaralyq tájirıbe muqııat zerdelenip, Eýropa odaǵynyń Áleýmettik kodeksi basshylyqqa alyndy. Bul rette elimizdiń óz erekshelikteri jan-jaqty eskerildi.

Birinshi novella – bul memlekettik organdardyń barlyq qoldanystaǵy aqparattyq júıeleriniń derekteri negizinde qalyptastyrylatyn Otbasynyń tsıfrlyq kartasy (OTsK). Ony engizý aıasynda qazaqstandyqtar teń dárejede memlekettik qoldaý júıesiniń kómegine súıene alady.

Sonymen qatar áleýmettik osal toptarǵa beriletin járdemaqylardyń somasyn kóbeıtý eskerilip otyr.

Kodekstiń kelesi jańalyǵy áleýmettik qyzmet kórsetý júıesin transfomatsııalaýǵa qatysty. Onyń basty maqsaty - múgedektigi bar adamdar úshin, ásirese, aýyldy jerlerde arnaýly áleýmettik qyzmetterdi kóbeıtý.

«Múgedektigi bar adamdarǵa qyzmet kórsetý isine olardyń otbasy múshelerin tartý eskerilgen. Bul rette otbasy múshesi jeke kómekshi retinde rásimdeledi. Bul jumysqa eńbekaqy tólenedi jáne osy kiristen áleýmettik tólemder men zeınetaqy jarnalary aýdarylady. Bul turǵyda otbasy músheleri eńbekke qabiletti jasynda jumyspen qamtylady», - dedi T. Dúısenova.