Áleýmettik-eńbek salasynyń statıstıkasy, salystyrmaly dınamıkasyn aqparat panelinen kórýge bolady

NUR-SULTAN. QazAqparat - Eńbek resýrstaryn damytý ortalyǵy saıtynda test rejıminde elimizdiń áleýmettik-eńbek salasynyń negizgi kórsetkishteri beriletin dashbord (aqparattyq panel) iske qosyldy, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

Dashbord halyqty jumyspen qamtý, eńbek, kóshi-qon jáne áleýmettik qamtamasyz etý boıynsha ózekti statıstıkalyq derekterdi kórsetedi, olar Ulttyq statıstıka bıýrosynyń, QR Eńbek jáne áleýmettik qorǵaý mınıstrliginiń aqparattyq júıeleriniń, sondaı-aq Elektrondy eńbek bırjasynyń derekteri negizinde únemi jańartylyp otyrady.

Dashbordty iske qosýdyń negizgi maqsaty ashyqtyqty arttyrý, eńbek naryǵy men áleýmettik sala týraly biregeı aqparatqa qol jetkizýdi jeńildetý bolyp tabylady.

«Memleket basshysy Qasym-Jomart Toqaev Qazaqstan halqyna Joldaýynda: «Aqparattyń ashyqtyǵy azamattardyń keń aýqymyn memlekettik saıasat sharalaryn iske asyrý protsesine tartýdyń kepili bolyp tabylady», - dep atap ótken bolatyn. Ashyqtyq pen qoǵamǵa esep berýdi qamtamasyz etý – bul memlekettik organdar men kvazımemlekettik sektor qyzmetindegi basymdyq. Osyǵan baılanysty, Eńbek jáne áleýmettik qamtamasyz etý naryǵy týraly aqparattyń bastapqy kózi retinde ERDO áleýmettik-eńbek salasy boıynsha ózekti jáne naqty aqparatty qamtamasyz etýdi óz aldyna mindet qoıady», - deıdi Eńbek resýrstaryn damytý ortalyǵy basshysy Dáýlet Arǵyndyqov.

Panelde statıstıka kórsetkishteri ǵana emes, aldyńǵy kezeńmen salystyrǵanda olardyń dınamıkasy da kórsetiledi. Sondaı-aq, paıdalanýshylarǵa derekterdi odan ári paıdalaný úshin sońǵy 5 jyldaǵy dınamıkamen biriktire júkteý múmkindigi beriledi.

«Sapaly jáne senimdi derekter zertteý júrgizý, gıpotezany rastaý, sheshim qabyldaý protsesi, elimizdegi qazirgi jaǵdaıdy baǵalaýǵa negiz bolady. Aqparatqa shekteýli qoljetimdilik buǵan kedergi keltirýi múmkin. Sondyqtan biz saıtymyzda BAQ, sarapshylar qaýymdastyǵy jáne qarapaıym azamattar úshin yńǵaıly aqparat kózi bolýy tıis dashbord qurdyq. Biz odan ári onyń «paıdalanýǵa jaramdylyǵyn» qamtamasyz etý úshin paıdalanýshylardyń qajettilikterine qaraı qarqyndy jumys isteýdi jáne jetildirýdi jalǵastyramyz», – dep atap ótti ortalyqtyń Strategııa jáne jobalyq basqarý departamentiniń dırektory Aleksandra Molchanovskaıa.

Ortalyq sarapshy, taldaýshylardy jáne basqa da múddeli azamattardy deshbordtyń test nusqasyn jetildirýge shaqyrady. Servısti jaqsartýǵa qatysty pikir men tilekti [e-mail] poshtasyna jiberý kerek.