Áleýmettik baspanany bólýde zańsyzdyqqa barǵan 61 sheneýnik jaýapqa tartyldy

NUR-SULTAN. QazAqparat – Prokýratýra organdary «Nurly jer» memlekettik baǵdarlamasyn iske asyrýy kezindegi zańdylyqtyń jaı-kúıine taldaý júrgizdi. Bul jaıynda Májilis depýtattarynyń saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.

«Prokýratýra organdary ákimdikterdiń 2018-2019 jyldary jáne 2020 jyldyń ótken kezeńinde «Nurly jer» memlekettik baǵdarlamasyn iske asyrýy kezindegi zańdylyqtyń jaı-kúıine taldaý júrgizdi. Taldaý turǵyn úı saıasaty, onyń ishinde áleýmettik turǵyn úıdi bólý jáne esepte turǵan azamattardy túgendeý salasyndaǵy zańdylyqtyń buzylýyn anyqtady», - dedi Úkimet basshysy.

Onyń atap ótýinshe, taldaý qorytyndysynda Qazaqstan Respýblıkasynyń Bas prokýratýrasy turǵyn úıdi zańsyz berý faktileri, azamattardy esepten ýaqtyly shyǵarmaý jáne zańsyz shyǵarý, turǵyn úıdi bólý jáne muqtaj adamdardy esepke alý salasynda biryńǵaı operator qurý jáne laýazymdy tulǵalardy, onyń ishinde jergilikti atqarýshy organdar basshylaryn tártiptik jaýapqa tartý qajettigi týraly nusqama berildi.

«Anyqtalǵan faktileri boıynsha 16 óńirde 61 laýazymdy tulǵaǵa qatysty tártiptik jaýapkershilik is-sharalary qabyldandy», - dedi Asqar Mamın.

Aıta keterligi, Búginde turǵyn úı alýǵa kezekte turǵandardyń respýblıkalyq bazasynda shamamen 556 myń adam bar. Onyń ishinde tabysy bir eń tómengi kúnkóris deńgeıinen tómen halyqtyń áleýmettik osal toptarynyń 195 myńy turǵyn úıge muqtaj.