​​ Áleýetti ınvestor Qazaqstannyń shet elderdegi mekemesinen JSN jáne elektrondyq tsıfrlyq qoltańba ala alady

ASTANA. QazAqparat - Áleýetti ınvestor Qazaqstannyń shet elderdegi mekemesinen JSN jáne elektrondyq tsıfrlyq qoltańba ala alady. Bul týraly Májilis depýtattarynyń saýalyna QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarınniń jaýabynda aıtylǵan, dep habarlaıdy QazAqparat tilshisi.

«Qazaqstan Respýblıkasynyń Úkimeti Qazaqstan Respýblıkasyndaǵy ınvestıtsııalyq ahýaldy jaqsartý boıynsha turaqty negizde jumys júrgizýde. Qazaqstan Respýblıkasynyń aýmaǵynda ınvestıtsııalyq qyzmetti júzege asyratyn Qazaqstan Respýblıkasynyń beırezıdentteri úshin ınvestorlyq vıza alý tártibin ońaılatý úshin Qazaqstan Respýblıkasy Investıtsııalar jáne damý mınıstriniń 2015 jylǵy 29 jeltoqsandaǵy №1265 buıryǵyna «Qazaqstan Respýblıkasynyń beırezıdenti bolyp tabylatyn jáne Qazaqstan Respýblıkasynyń aýmaǵynda ınvestıtsııalyq qyzmetti júzege asyratyn adamdar úshin ınvestorlyq vıza alýǵa ótinish berý» memlekettik qyzmet kórsetý merzimin reglamentteý jáne 5-ten 3 jumys kúnine deıin qysqartý bóliginde ózgerister men tolyqtyrýlar engizdi», - dedi vıtse-premer jaýabynda.

Sonymen qatar, ol QR beırezıdentteri úshin ınvestorlyq vıza alý tártibin ońaılatý maqsatynda sheteldik ınvestordyń Qazaqstan Respýblıkasyna kelýine kelisilgen shaqyrý negizinde vızalyq-kóshi-qon portaly arqyly bir rettik elektrondyq ınvestorlyq vızalardy resimdeý boıynsha fýnktsıonal iske asyrylǵanyn aıtady.

«Bul fýnktsıonal sheteldik ınvestorǵa qosymsha ýaqyt pen jol shyǵyndarynsyz «A5» sanatyndaǵy bir rettik elektrondyq vızany resimdeýge múmkindik beredi. Budan basqa, shetel azamattarynyń Qazaqstan Respýblıkasynyń aýmaǵynda memlekettik qyzmetterdi alý múmkindigin usyný úshin shetel azamattaryna elektrondyq tsıfrlyq qoltanba berý boıynsha jumys júrgizdi. Áleýetti ınvestor «bir ótinish» qaǵıdaty boıynsha Qazaqstan Respýblıkasy shet elderdegi mekemesinen JSN jáne elektrondyq tsıfrlyq qoltańba ala alady», - dedi Serik Jumanǵarın.