Álen Joldasov: Joldaýdan túıgenim - memleket eńbekqordyń tabysyn arttyrýdy kózdeıdi

JARKENT. QazAqparat - Eńbek ete bilgen adamnyń eshqashan eshkimge esesi ketpek emes. Elbasy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyna oraı óz pikirin bildirgen Almaty oblysy Panfılov aýdany «Qamqorlyq» jaýapkershiligi shekteýli seriktestiginiń dırektory Álen Ábilmájinuly Joldasovtyń oı-tujyrymy osyndaı.

Atalǵan seriktestik aýdannyń Úlkenshyǵan aýyldyq okrýgine qarasty «Qant qyzylshasynyń elıtalyq tuqymyn óndiretin sharýashylyq» mártebesine ıe, - dep habarlaıdy QazAqparat tilshisi.

«Elbasynyń Joldaýymen tanysyp shyqtyq. Osy Joldaýdyń «Halyq tabysynyń ósýi» atty birinshi bólimindegi «Adam eńbekqor bolyp, óz kásibin jaqsy meńgergende jáne laıyqty jalaqy alýǵa nemese jeke kásip ashyp, ony damytýǵa múmkindik bolǵan kezde tabys artady» degen sózder kókeıime qona ketti. Prezıdenttiń aıtyp otyrǵany ras. Óz kásibińniń qyr-syryn jetik meńgerip, eseli eńbek etseń tabysyń da tasqyndap, paıdań da arta túspeı me?! Abaı atamyzdyń «Eńbek etseń erinbeı, Toıady qarnyń tilenbeı» degeni de osyndaıda oıǵa oralady. Sosyn Joldaýda Elbasy agroónerkásip kesheniniń álýetin tolyq iske asyrý kerektigin aıtyp, memlekettik qoldaýdyń barlyq sharalaryn elimizge zamanaýı agrotehnologııalardy aýqymdy túrde tartýǵa baǵyttaý qajettigin atap ótti.

Dál osyny biz óz is-tájirıbemizden jete túısingenmiz: barshaǵa málim, qant qyzylshasy buryn tehnıkalyq daqyl bolyp eseptelse, qazir strategııalyq ónimge aınaldy. Búkil elimizde jergilikti qyzylsha tuqymyn ósiretin jalǵyz ǵana sharýashylyq bolyp esepteletin bizdiń seriktestik on bes jyldan beri Qazaq eginshilik jáne ósimdik sharýashylyǵy ǵylymı-zertteý ınstıtýtymen jáne Ýkraınanyń bıotehnıkalyq qant qyzylshasyn ósiretin akademııasymen tyǵyz baılanysta jumys istep keledi», - deıdi seriktestik basshysy.

Onyń aıtýynsha, seriktestik qazir qyzylshanyń nebir túrlerin ósirip, basqa óńirlerdegi mamandanǵan sharýashylyqtermen yntymaqtasa eńbek etip jatyr.

«Sonyń arqasynda qazir elimizge qajetti barlyq qant qyzylshasy tuqymynyń 11 paıyzyn qamtamasyz etip otyrmyz. Aldaǵy ýaqytta osy tabysymyz molaıa túsetini sózsiz. Óıtkeni, Elbasynyń jańa Joldaýynyń túp tórkini - biz sekildi qarapaıym sharýalardyń, jalpy halyqtyń tabysyn arttyrý. Jańa baǵdarlama osy baǵytta senimimizdi arttyryp, qulshynysty kúsheıte tústi», - deıdi Álen Joldasov.