Álemniń ártúrli elderindegi Olımpıada jeńimpazdaryn qandaı júldeler kútip tur

<p>ASTANA. KAZINFORM &mdash; Olımpıadashylar men paralımpıadashylar jarystardan udaıy úlken jeńistermen oralady, biraq olardy týǵan jerinde ártúrli qarsy alady. Kazinform tilshisi álemniń ártúrli elderinde Olımpıada júldeleri úshin sportshylarǵa qandaı syıaqy tólenetinin anyqtady.</p>

2024 jyly keıbir sport uıymdary alǵash ret sportshylardy marapattaý týraly sheshim qabyldady. Máselen, Dúnıejúzilik jeńil atletıka federatsııasy jeńil atletıkadan altyn júldege ıe bolǵandarǵa 50 000 AQSh dollary kóleminde syıaqy beretinin jarııalady.

Halyqaralyq boks qaýymdastyǵy (IBA) bokstan altyn medal alǵan sportshylarǵa 100 myń dollar, kúmis medal úshin 50 myń dollar jáne qola medal úshin 25 myń dollar tóleıtinin málimdedi. Sonymen qatar, 5-oryn alǵan sportshylarǵa 10 myń AQSh dollary beriledi.

- Nátıjesinde jalpy júlde qory 3,1 mıllıon dollardan asyp, 100-den astam boksshyǵa bólinedi, - dedi IBA prezıdenti Ýmar Kremlev.

Basqa da birqatar elder úzdik sportshylaryn marapattaıdy.

Parıj Olımpıadasynyń gonkongtyq altyn júldegerleri eń joǵary aqshalaı syılyq – 6 mıllıon gonkong dollaryna ıe bolady, bul shamamen 770 myń AQSh dollaryn quraıdy.

Sıngapýr marapattaý baǵdarlamasy – Major Games Award arqyly jeke sport túrleri boıynsha jeńimpazdarǵa 1 mıllıon sıngapýr dollaryn usynady, bul 700 myń AQSh dollaryn quraıdy. Komandalyq sport túrlerinen jeńimpazdarǵa 2 mıllıon sıngapýr dollary nemese shamamen 1,6 mıllıon AQSh dollary tólenedi. Kúmis júldegerler joǵaryda atalǵan somanyń 50%-yn, qola júldegerler 25%-yn alady.

Qazaqstan, Malaızııa, Marokko, Italııa, Vengrııa jáne Mysyr Parıjdegi Olımpıada oıyndarynan jeńimpaz bolyp oralǵandarǵa 112-den 365 myń AQSh dollardy quraıtyn alty tańbaly soma usyndy.

Ózbekstanda altyn medal jeńip alǵan sportshylar 200 myń AQSh dollary kóleminde, kúmis medal — 100 myń AQSh dollary jáne qola medal — 50 myń AQSh dollary kóleminde syıaqy alady.

Grýzııa Úkimeti medal ıegerlerine 250 myńnan mıllıon larıge deıin syıaqy tóleıdi, bul 92 myńnan 368 myńǵa deıingi AQSh dollaryn quraıdy.

Úndistan úkimeti altyn medal ıegerlerine 90 myń AQSh dollaryn, al Úndistan olımpıada qaýymdastyǵy 120 myń AQSh dollaryn tóleıdi.

AQSh — ta Olımpıadanyń altyn medal ıegerleri sáıkesinshe 37,5 myń dollar, kúmis jáne qola 22,5 myń dollar jáne 15 myń dollar alady. Ulttyq sport uıymdarynda sportshylardy kótermeleýdiń ózindik baǵdarlamalary bar. Living The Dream medal Fund kúresten altyn olımpıada medaldary úshin 250 myń dollar, al USA Swimming júzýden altyn medaldar úshin 75 myń dollar usynady.