Álemniń ár túkpirinde qara jumys isteýge májbúr – Depýtat qazaq jastary týraly

<p><span style="font-family: sans-serif; font-size: 18px;">Búgin Májilistiń jalpy otyrysynda depýtat Nartaı Sársenǵalıev Ońtústik Koreıada zańsyz eńbek mıgranty atanǵan Qazaqstan azamattarynyń máselesin sheshýdi surady, dep habarlaıdy&nbsp;</span><a style="padding: 0px; margin: 0px; font-size: 18px; font-family: sans-serif;" href="https://kaz.inform.kz/" target="_blank" rel="noopener">QazAqparat tilshisi.</a></p>

«Bul saýaldy ózge elde zańsyz eńbek mıgranty atanyp, quqyǵy qorǵalmaı, qaýip qaıdan keledi dep jáýteńdep otyrǵan 20 myńnan astam qazaq balasynyń aryzy dep bilińiz. Jalaqyǵa jarymaı, tabaqtaı dıplomyna laıyqty jumys tappaı, qazaq jastary qazir álemniń ár túkpirinde qara jumys isteýge májbúr. Olardy sógýge eshkimniń quqyǵy joq. Qazir sol azamattarymyz zańdyq turǵyda esh qorǵansyz qalyp jatyr. Onyń bir dáleli – Ońtústik Koreıada eńbek etip jatqan otandastyrymyz. Resmı derekke toqtalsaq, 2022 jylǵy jaǵdaı boıynsha Ońtústik Koreıada elimizdiń 9600 azamaty zańsyz eńbek mıgranty bolyp jumys istedi. Al otyndastarymyzdyń basyn biriktiretin ortalyqtar qazir Ońtústik Koreıada 20 myńǵa jýyq qazaqstandyq júrgenin aıtyp jatyr. Zańsyz júrgen eńbek mıgrantynyń jaǵdaıy túsinikti. Eńbek quqyǵy qorǵalmaıdy, zańǵa súıenip jumys berýshiden óz quqyǵyn talap ete almaıdy», – dedi N. Sársenǵalıev Úkimet basshysy Álıhan Smaıylovtyń atyna joldaǵan saýalynda.

Bul turǵyda ol shetelde densaýlyǵyna zaqym kelgen Qazaqstan azamattaryna eshkim ótemaqy tólemeıtinin, sondaı-aq jumys berýshi olardy zańsyz eńbek mıgranty retinde quzyrly oryndarǵa ustatyp jibere alatynyn aıtty.

«Otandastarymyzdyń quqyǵy qorǵalmaýynyń sebebi – ekijaqty kelisimshart negizinde usynylatyn E-9 ýaqytsha eńbek vızasynyń berilmeýi. Memleket basshysy Úkimetke máseleni sheshýdi tapsyrǵan bolatyn. Biraq áli kúnge deıin bul túıtkildiń túıini tarqaǵan joq. Koreıa Respýblıkasymen 16 el «Eńbekke ruqsat berý júıesi» atty sheteldikterdi jumysqa ornalastyrý júıesine qosylǵanyn bilemiz. Atalǵan júıege Qazaqstan nege qosyla almaı keledi?», – dedi depýtat.

Osy oraıda ol qazaqstandyqtar qashan Ońtústik Koreıada zańdy eńbek mıgranty retinde eńbek ete alatynyn surady.

«Bul rette eki usynys bar. Birinshiden, Qazaqstandy «Eńbekke ruqsat berý júıesine» qosý úshin tıisti is-sharalar josparyn jedel pysyqtaýdy tapsyrý kerek. Ekinshiden, eki el arasynda ortaq kelisim jasalǵansha, Ońtústik Koreıada zańsyz eńbek mıgranty bop júrgen 20 myńǵa jýyq qazaqstandyqtyń quqyǵyn qorǵaıtyn zańdy tetikti tezirek tabý qajet», – dedi Nartaı Sársenǵalıev.

Eske salaıyq, buǵan deıin Koreıa Respýblıkasy zańsyz ımmıgranttar úshin «jasyl dáliz» jarııalaǵan bolatyn. Oǵan sáıkes zańsyz júrgen sheteldikterge osy jyldyń 31 jeltoqsanyna deıin óz erkimen elden shyǵýyna múmkindik beriledi.

Sondaı-aq Ońtústik Koreıaǵa zańsyz kirgeni úshin eki qazaqstandyqqa sot úkimi shyqqan bolatyn.