Álemniń úzdik sadaqshylary elorda tórinde jınalady

NUR-SULTAN. QazAqparat - «Nur-Sultan Ethno Fest» merekesi aıasynda jamby atýdan ótetin «Altyn jebe» І Álem chempıonatynda dúnıejúziniń aıtýly mergenderi baq synaıdy, dep habarlaıdy QazAqparat qalalyq mádenıet jáne sport basqarmasyna silteme jasap.

Qazirgi kezde dúbirli dodaǵa álemniń 20 memleketinen úzdik mergender qatysatynyn rastady. Onyń ishinde Ortalyq Azııa elderinen ózge Malaızııa, Ońtústik Koreıa, Iordanııa, Rýmynııa, Fınlıandııa, Polsha, Vengrııa jáne taǵy basqa memleketterdiń ókilderi bar.

Buǵan deıin jamby atýdan «Altyn jebe» básekesi elorda tórinde eki márte halyqaralyq týrnır retinde ótkizilgen-di. «Altyn jebe» jarysyn dúnıejúzilik deńgeıge kóterý maqsatynda bıyl elimizde tuńǵysh ret jamby atýdan І Álem chempıonaty uıymdastyryldy. QR Mádenıet mınıstrliginiń jyldyq kúntizbelik josparyna sáıkes ótkiziletin bul álemdik mergender saıysyna Ońtústik Afrıka, Malaızııa, Ońtústik Koreıa, Iordanııa, Rýmynııa, Fınlıandııa, Polsha, Vengrııa jáne birneshe Azııa memleketteriniń ataqty mergenderi qatysady. І Álem chempıonatynyń mergendik básekeleri «Azııa stıli», «Túrik stıli» jáne jamby atý erejeleri boıynsha ótkiziledi.

Eske salyp ótsek, 2017 jyly jáne 2018 jyly uıymdastyrylǵan «Altyn jebe» halyqaralyq týrnırine Majarstan, Ońtústik Koreıa, Fınlıandııa, Malaızııa, Túrkııa, Monǵolııa, Reseı, Rýmynııa, Polsha syndy onnan astam eldiń áıgili mergenderi qatysqan bolatyn. «Altyn jebe» týrnıriniń bas júldesi eki jyl qatarynan rýmynııalyq surmergen Mıhaı Kozmeıge buıyrdy. Al, týrnırdiń kúmis, qola júldelerin Aıtbek Sarybaı, Eralhan Aıkóz, Abzal Tolybekovter ıelendi.

Nur-Sultan qalasy ákimdigi men QR Ulttyq sport qaýymdastyǵy birlese uıymdastyrǵan «Nur-Sultan Ethno Fest» merekesinde Álem chempıonatynan basqa da kóptegen qyzyqty sharalar ótedi. Atap aıtqanda, atalmysh mereke ótetin «Han-shatyr» kesheniniń mańynda aýqymdy etno-qalashyq boı kóteredi. Balalar úshin biregeı etno-attraktsıondar ashylady. Ulttyq salt-dástúr men kitap kórmeleri ótedi. Aqyndar aıtysy uıymdastyrylady. Balalar men eresekterge arnalǵan aýdaryspaq, sadaq atý, arqan tartý, asyq atý sııaqty kóptegen ulttyq oıyn qatysýshylaryna marapattar men júldeli syılyqtar tabys etiledi. Qazaq kúresiniń boz kilemi tóselip, ataqty balýandar sheberlik sabaqtaryn júrgizedi. Sondaı-aq, osy kúnderi etno-qalashyqqa kelgen búldirshinderge altybaqanda terbelý, ponı attarǵa minip serýendeý sııaqty qyzyqtar tegin kórsetiledi.

«Nur-Sultan Ethno Fest» festıvaliniń resmı ashylýy 31 mamyrda saǵat 19.00-de ótedi.