Álemniń keıbir elderinde vaktsınalaý sharalary qalaı júrgizilip jatyr

NUR-SULTAN. QazAqparat – Japonııa, Qytaı jáne Shvetsııa elderinde vaktsınalaý sharalary qalaı júrip jatyr? QazAqparat Sanıtarııalyq-epıdemıologııalyq baqylaý komıtetine silteme jasap habarlaıdy.

Japonııada azamattardy jumys jáne oqý oryndarynda COVID-19-ǵa qarsy egý sharalary bastaldy. Elde ýnıversıtetter men jumys oryndarynda kásiporyndardyń qyzmetkerlerin vaktsınatsııalaýǵa arnalǵan 3,4 myńnan astam alań tirkelgen. Memlekettiń mınıstrler kabınetiniń Bas hatshysy Katsýnobý Katonyń aıtýyna qaraǵanda, mundaı strategııa Japonııa halqyn koronavırýstyq ınfektsııaǵa qarsy vaktsınatsııalaý qarqynyn arttyrady.

Qytaılyq dárigerler koronavırýstyq ınfektsııaǵa qarsy vaktsınatsııalaý naýqany bastalǵannan beri el turǵyndaryna bir mıllıardtan astam ekpeni saldy. Bul týraly QHR memlekettik gıgıena jáne densaýlyq saqtaý jónindegi komıtetinen habarlandy.
2021 jyldyń 19 maýsymyndaǵy jaǵdaıǵa sáıkes Qytaıdyń 31 ákimshilik birliginde koronavırýstyń jańa tıpine qarsy 1,01 mıllıard vaktsına jasaldy. Qytaıda koronavırýstyq ınfektsııaǵa qarsy ekpeni mindetti túrde alýy tıis halyqty vaktsınatsııalaý 2020 jyldyń 15 jeltoqsanynda bastalǵan bolatyn.
Shvetsııa COVID-19-ǵa qarsy vaktsına almaǵan adamdardyń elge kirýine tyıym salatyn talaptyń merzimin uzartty
El úkimeti EO memleketterinen jáne Eýropalyq ekonomıkalyq aımaqtan Shvetsııaǵa kirýge tyıym salatyn talaptyń kúshinde bolý merzimin uzartý týraly sheshim qabyldady.
Bul talap tek vaktsınatsııa sertıfıkatyn, PTR zertteýdiń teris nátıjesi nemese antıdenelerdiń bolýy týraly kýálikti usynǵan adamdarǵa qoıylmaıdy.
Shekteý merziminiń uzartylǵandyǵy týraly talap 30 maýsymda kúshine enip, 31 tamyzǵa deıin qoldanysta bolady. Danııa, Fınlıandııa, Islandııa jáne Norvegııa turǵyndarynyń el aýmaǵyna kirýine eshqandaı shekteýler qoıylǵan joq.