Álemniń eń ozyq 100 shyǵarmasy qazaq tiline aýdarylmaq

ASTANA. 23 qrasha. QazAqparat - Qazannyń 14-inde bastalǵan «100 kitap» jobasy máresine jetti. Sonymen qazaq tiline aýdarylatyn osy zamanǵy júz kitaptyń aqyrǵy tizimi bekitildi. Reıtıng boıynsha «Vlastelın kolets», «Zelenaıa mılıa», «Nad propastıý vo rjı» kósh bastady.

Bir aıǵa sozylǵan onlaın daýys berý nátıjesinde anyqtalǵan bul kitaptardyń áýelgi sany 492 bolǵan. Daýys berý kezinde qatysýshylar tizimge úsh júzge jýyq kitap qosqan. Kitaptardy saralaýdyń sharty boıynsha barlyq kitaptar osy zamanǵy, ıaǵnı 1950 jyldardan bergi jaryqqa shyqqan týyndylar bolýy kózdeldi. Sonymen qatar kitaptardyń túrli bedeldi ádebı syılyqtardy alýy eskerildi.

Tizimde álemdik ádebıette aty málim, qazaq oqyrmandaryna etene tanys Gabrıel Garsııa Markes, Harýkı Mýrakamı, Aleksandr Soljenıtsın, Paýlo Koelo, Robert Kııosakı jáne Nobel syılyǵyn ıelengen alǵashqy túrik jazýshysy Orhan Pamýktyń «Meniń atym Qyzyl» sekildi qazaq tiline áli aýdarylmaǵan týyndylary kezdesedi.

Jobaǵa Elbasynyń ótken jylǵy 14 jeltoqsandaǵy Qazaqstan halqyna joldaýynda atap ótken qazirgi za­manǵy ádebıetten kem degende 100 kitaptyń tizimin jasaýdy, olardy qazirgi zamanǵa saı qazaq tiline aýdarý ıdeıasy túrtki bolǵan. Qazaq tiliniń qoldanys aıasyn keńeıtýge degen yntadan týǵan baıqaýdy halyqaralyq «Bolashaq» stıpendııasy stıpendıattary qaýymdastyǵynyń aqparattyq qoldaýymen jáne Bilim jáne Ǵylym mınıstrligi jastar isi komıtetiniń qoldaýymen «S.A.R.» taldaý jáne boljaý ortalyǵy uıymdastyryp otyr. Endi kitaptar tizimi Bilim jáne ǵylym mınıstrliginiń talqylaýynan ótedi. Joba aýdarý, avtorlyq quqyqty paıdalanýǵa ruqsat alý sekildi sharýalardy esepke alǵanda, eki-úsh jyl kóleminde júzege aspaq, dep jazady «Astana aqshamy» basylymy.