Álemniń eń myqty 16 boksshysy Astana tórinde aıqasady
Kezdesý barysynda Beıbit Shúmenov mınıstrge álemniń eń myqty 16 kásibı boksshysy, olardyń qatarynda Katar Memleketi koroldik otbasynyń múshesi sheıhy Fahad Bın Halıd Al-Tanıdyń qatysýymen boks keshin ótkizýdi josparlap otyrǵanyn aıtty. Oǵan Katar ámiri Tamım bın Hamad Al-Tanı keledi. Boks keshiniń basty qaharmany - Beıbit Shúmenov. Keshti ataqty Maıkl Baffer júrgizýi yqtımal. Sharaǵa attary ańyzǵa aınalǵan boksshylar Roberto Dıýran, Devıd Heı, Horhe Lınares, Hasım Rahman, Zab Djýda, Evander Holıfıld, UFC sportshylary Habıb Nýrmagomedov jáne Zýbaıra Týhýgov, sonymen qatar, Dúnıjúzilik boks qaýymdastyǵynyń basshylyǵy keledi dep kútilýde.
Sondaı-aq, kezdesý barysynda Astanada WBA (Dúnıejúzilik boks qaýymdastyǵy) dırektorlar keńesiniń jınalysyn ótkizýge basty nazar aýdaryldy. Arystanbek Muhamedıuly Astanada osyndaı aýqymdy sharany ótkizýdiń mańyzdylyǵyn atap ótip, elimizde bokstyń búgingiden de qarqyndy damýyna sep bolatynyn aıtty. Sonymen qatar, mınıstrliktiń atalǵan jıyndy Astanada ótkizý úshin bar jaǵdaıdy jasaıtynyn jetkizdi.
Óz kezeginde, Beıbit Shúmenov Arystanbek Muhamedıulyna elimizde kásibı bokstyń damýyna jasap jatqan qoldaýy úshin alǵys bildirdi.
«Búgin, biz óte mańyzdy kezdesý ótkizdik. WBA basshylyǵy bizdiń promoýterlik kompanııamyzǵa atalǵan jıyndy Astananyń 20-jyldyǵyn merekeleý aıasynda ótkizý boıynsha nıetin bildirdi. Meniń oıymsha, Astana boks áleminde qordalanyp qalǵan máselelerdi sheshýde bas qosatyn taptyrmas alań bolmaq. Bul shara Qazaqstannyń kásibı boksyn damytý úshin túrtki bolady dep esepteımin. Sonymen qatar, jastardyń salaýatty ómir saltyn ustanýǵa degen qyzyǵýshylyǵyn oıatady dep bilemin», - dedi Shúmenov.
Aıta keterligi, WBA dırektorlar keńesiniń jınalysy men boks keshi shildeniń basyna josparlanyp otyr. Oǵan QR Mádenıet jáne sport mınıstrligi, Astana qalasynyń ákimdigi men QR Kásibı boks federatsııasy qoldaý bildiredi.