Álemniń ár túkpirinde júrgen aqtóbelikter oblystyń 85 jyldyǵyna jınalady

AQTÓBE. QazAqparat - Bıyl Aqtóbe oblysyna 85 jyl. «Aqtóbe - qutty meken!» ataýymen ótetin ataýly data kezinde álemniń ár túkpirinde júrgen aqtóbelikter shaqyrylady, dep habarlaıdy QazAqparat tilshisi.

Búgin úkimettik emes uıym ókilderimen kezdesken oblys ákimi Berdibek Saparbaev aldaǵy kúnderdiń birqatar josparymen bólisti. Máselen, Aqtóbede Jubanovtar úıi, Analarǵa taǵzym úıi salynýy múmkin. Al bıyl qyrkúıek aıynda oblystyń 85 jyldyǵy atalyp ótiledi.

«Aqtóbe - qutty meken!» 85 jyldyq osy ataýmen ótedi. Biz jerlesterimizdi shaqyramyz. Olar ózderiniń usynystarymen kelýi kerek. Máselen, AQSh-ta turatyn Olımpıada chempıony Valerıı Lýkın kelemin dedi. Ol bizdiń sportshylarymyzǵa qoldaý kórsetip, janyna alyp, tárbıeleýge daıyn»,- dedi oblys ákimi Berdibek Saparbaev. Úkimettik emes uıym ókilderi de ataýly dataǵa oraı óz usynystaryn berýi qajet. Al Aqtóbede týyp, ósip, tárbıe alǵan, keıin ár elge ketip, eńbek etip júrgen barlyq azamat kúzde arnaıy shaqyrylady. Olar týǵan jerdiń damýyna úles qosýy úshin óz úlesterin qosatyn kez jetti.

«Kimdi bilmeımiz, kim eskerýsiz qaldy? Bıznes, óner, mádenıet, sport sekildi ár salanyń adamdaryn shaqyryp, usynystar tyńdaımyz, qoldaýlaryn kútemiz», - dedi B.Saparbaev.

Aıta keteıik, Aqtóbeniń 85 jyldyǵyna oraı óńirde arnaıy top quryldy. Topqa oblystyq máslıhat hatshysy Sánııa Qaldyǵulova tóraǵalyq etedi.