Álemniń 51 elindegi qazaqstandyqtar referendýmǵa qatysa alady

NUR-SULTAN. QazAqparat – Respýblıkalyq referendýmǵa álemniń 51 elindegi qazaqstandyqtar qatysa alady. Bul týraly Ortalyq saılaý komıssııasy tóraǵasynyń orynbasary Konstantın Petrov aıtty, dep habarlaıdy QazAqparat tilshisi.

«Qazaqstan Respýblıkasynyń 51 memlekettegi ókildikteri janynan ýchaskeler qurylady. Bul ýchaskelerde tizimge saılaý quqyǵy bar, tıisti memlekette turatyn nemese uzaq merzimdi sheteldik issaparda júrgen jáne QR azamatynyń jaramdy pasporty bar barlyq azamattar engiziledi»,

- dedi Konstantın Petrov Ortalyq saılaý komıssııasynda ótken otyrysta.

Shet memleketterge jeke shaqyrý boıynsha, qyzmettik, iskerlik jáne týrıstik saparǵa barǵan qazaqstandyqtar ýchaskelik komıssııaǵa júginýi kerek jáne QR azamatynyń jaramdy pasportyn kórsetýi tıis.

«QR Syrtqy ister mınıstrligi sheteldegi azamattardyń tizimine engizý úshin QR aýmaǵynan tys ornalasqan ýchaskelik komıssııalarǵa kómek kórsetedi. Jalpy, jergilikti atqarýshy organdar referendým komıssııalarymen birlesip, referendým ótetin kúni ýchaskege kelgen azamat ózin tizimnen taýyp, Konstıtýtsııada kepildik berilgen quqyǵyn kedergisiz iske asyrýy úshin barlyq sharalardy qabyldaýy tıis»,

- dedi K. Petrov.

Aıta keteıik, Ortalyq saılaý komıssııasy 5 maýsymda ótetin respýblıkalyq referendým komıssııalarynyń qyzmeti týraly qaýly qabyldady. Úgitteý jumystary referendým taǵaıyndalǵannan sátte bastalyp, daýys berýdiń aıaqtalýyna bir kún qalǵanda, ıaǵnı 2022 jyly 4 maýsymda saǵat 00-00-de aıaqtalady.

Referendým kezinde epıdahýal nasharlaǵan jaǵdaıda Ashyq jobasy qoldanylady.