«Álemniń 30 eliniń qataryna ený - bizdiń qolymyzdan keledi» - baspasózge sholý
***
«Qazaqstan Respýblıkasynyń Konstıtýtsııasy jáne Memlekettik qyzmet jónindegi zańnamaǵa sáıkes jańadan taǵaıyndalǵan saıası memlekettik qyzmetkerler, joǵary laýazym ıeleri el halqy men Prezıdentine ózderine júktelgen mindetti adal jáne ádiletti atqaratyndyǵy týraly ant berdi. Saltanatty jaǵdaıda berilgen antty Prezıdent Nursultan Nazarbaev qabyldady. Osy jaıt arqaý bolǵan maqala «Egemen Qazaqstan» gazeti senbilik sanynda «Zańdylyq pen ádilettilikten aınymaımyz» degen taqyryppen berildi. «Saltanatty ant berý rásimi memlekettik qyzmetshige óte úlken jaýapkershilik júkteıdi. Prezıdentten bastap barlyq memlekettik qyzmetshiler halqyna osylaı ant berip, ózderine júktelgen mindetti ádiletti jáne jan aıamastan atqaratynyna sendiredi. Táýelsiz elimizge, týǵan halqymyzǵa adal qyzmet etý - barshamyzdyń mindetimiz. Ant bergen barlyq laýazymdy qyzmetkerler memlekettik bılikke barlyq kúsh-jigerin jumsaýǵa tıis. Saıası memlekettik qyzmetshi bolý - mártebeli mindet. Ásirese, búgingi memlekettik qyzmetke reforma jasap otyrǵan kezde onyń mańyzdylyǵy tipti artyp otyr», - dedi Prezıdent.
«Eldi ushpaqqa shyǵarady degen memlekettik mekemelerdiń tórinde otyryp, jymysqy áreketterin jalǵastyryp jatqan sheneýnikterdi anyqtaý ońaı emes. Tek olardyń jasyryn sybaılasqan áreketinen el ábden zardap shegip, adal adamdar barynan aıyrylǵanda ǵana jemqorlardyń jegeni bilinip qalady», - dep jazady «Egemen Qazaqstan» gazeti búgingi sanyndaǵy «Bul dertke qarsy kúres kúsheıtilýi tıis» degen taqyryptaǵy maqalasynda. Máselen, TJM sybaılastyq jónindegi memlekettik organdardyń alǵashqy bestiginen oryn alǵan. 2011 jyly TJM qyzmetkerleri tarapynan jasalǵan sybaılas jemqorlyq sıpattaǵy qylmys kórsetkishi 37 derekti qurady. Endi kelesi jyly bul jaǵymsyz kórsetkish tómendegen shyǵar dep oılaısyz ǵoı. Joq, tómendemek túgili sol kúıinde de turmady, kerisinshe, kóbeıip ketipti. Tótenshe jaǵdaılar jemqorlary «Qulasań nardan qula» degendeı, 2012 jyldyń 11 aıy ishinde sybaılas jemqorlyq áreketti 46-ǵa ósirip jibergen.
***
«Aıqyn» gazetiniń búgingi sanynda Májilis depýtaty, tehnıka ǵylymdarynyń doktory, professor, «Nur Otan» HDP fraktsııasynyń múshesi Vıktor Kııanskıımen aradaǵy suhbat «Álemniń 30 eliniń qataryna ený - bizdiń qolymyzdan keledi» degen taqyryppen berilgen. Basylym tilshisiniń barlyq saýalyna tuşymdy jaýap bergen halyq qalaýlysy: «Ekologııalyq jaǵdaıdy jaqsartý maqsatynda sý máselesin retteýge basa kóńil bólýimiz kerek. Sý - tek bizdiń ǵana emes, HHІ ǵasyrdyń, barlyq elderdiń basty problemasy. Biz qazirgi tańda kishi ózenderge, aryqtarǵa erekshe mán bermeı otyrǵan sııaqtymyz. Negizinen aýyldardy shaǵyn ózender asyrap otyr. Biz erigen qardyń sýyn saqtaý dástúrin qaıta jańǵyrtýymyz qajet», - deıdi.
Elbasy Nursultan Nazarbaev Joldaýynda jastar qyzyǵyp oqıtyn álemniń eń úzdik 100 kitabyn qazaq tiline aýdarý máselesin tilge tıek etken bolatyn. Prezıdenttiń bul usynysy jastar arasynda qyzý qoldaý taýyp, «Jas Otan» jastar qanaty «Kel, jastar, oqylyq» respýblıkalyq sharasyn bastap ta ketti. Osyǵan oraı «Aıqyn» gazeti «100 kitaptyń ishine qandaı eńbekter enýi tıis?», «Jastardy qandaı kitaptar qyzyqtyrýy múmkin?» degen suraqtarǵa jaýap alý úshin mamandar pikirine júgingen. Mamandar pikiri «100 kitaptyń ishine qandaı eńbekter enýi tıisi?» degen taqyrypqa toptastylyrǵan.
***
«Keshe Memleket basshysy Nursultan Nazarbaev Qazaqstannyń oblys ákimderimen birqatar kezdesý ótkizdi», - dep jazady «Kazahstanskaıa pravda» gazeti. Basylymnyń atap ótýinshe, kezdesý qorytyndysy boıynsha Memleket basshysy oblys basshylaryna respýblıkanyń barlyq óńirinde jumyspen qamtýdy, halyqtyń ál-aýqatyn arttyrýdy qamtamasyz etý jóninde birqatar naqty tapsyrma berdi, sondaı-aq elimizdiń áleýmettik-ekonomıkalyq damýy jóninde alǵa qoıylǵan barlyq maqsattar men mindetterdi sapaly iske asyrý qajettigin atap ótti.