Álemge jańa Qazaqstandy tanytqymyz keledi – Prezıdent Teleradıokesheni dırektorynyń orynbasary
«Qazaqstan Respýblıkasy Prezıdentiniń Teleradıokesheni – elimizdiń aqparat keńistigindegi ártaraptandyrylǵan, birneshe medıakompanııalardyń basyn bir arnaǵa toǵystyrǵan, qurylymy men quzyreti erekshe biregeı holdıng. Biz bıylǵy jyldan bastap, birneshe úlken kompanııalardy ózimizdiń medıa aktıvke biriktirdik. Jekelep aıtar bolsaq, bul medıaqurylym aktıvterine el aýmaǵynda táýlik boıy habar taratatyn «Jibek Joly» telearnasy, odan keıin halyqaralyq keńistikke taraıtyn «SilkWay» arnasy jáne «Kazinform» halyqaralyq aqparat agenttigi, KazTube medıaplatformasy jáne «Derekti fılmder ortalyǵy» kiredi», - dedi Tilegen Ábishev.
Onyń aıtýynsha, tıimdi ári biregeı medıaplatforma qurý úshin aqparattyq keńistik kez kelgen suranymǵa saı bolýy tıis.
«Jobalarǵa jeke-jeke toqtalsaq, bıyl biz «Jibek Joly» telearnasy syndy jańa arnanyń qalyptasýyna kúsh jumsadyq. Bar-joǵy 4 aıdyń ishinde «Jibek Joly» arnasynyń jumysyn bastaǵaly birneshe janrda habarlar túsirdik. Otbasylyq telearna bolǵandyqtan, aqparattyq, saraptamalyq, tok-shoý tanymdyq janrdy qamtıtyn 15 jańa baǵdarlama efırge shyqty. Habar taratý táýlik boıy júzege asyrylady. Oǵan qosa, telearna óz aýdıtorııasyna álemdik, otandyq kınoındýstrııanyń tanymal týyndylary men túrli telehıkaıalar jáne kishkentaı kórermender úshin mýltfılmder usynyp keledi. Bir sózben aıtqanda, kez kelgen jastaǵy kórermen óz tanym-talǵamyna saı ónimderdi efırden kóre alady», - dedi spıker.
Sonymen birge Prezıdent teleradıokeshenine qarasty «SilkWay» halyqaralyq telearnasy álemniń 120 eline qazaq, orys, aǵylshyn, qyrǵyz, ózbek tilderinde dýblıaj arqyly habar taratady. Bıylǵy sáýirden bastap, arna efıri 70 paıyzǵa jańartyldy, jańa jobalar qosyldy, oǵan qosa arnada aǵylshyn tilinde kúnine 4 márte habar taratatyn jańalyqtar baǵdarlamasy da shyǵa bastady.
«Prezıdent teleradıokesheni shet memleketterden, sonyń ishinde Qazaqstannyń syrtqy saıası múddelerine basymdyq beretin aımaqtarda telearnanyń úzdik jobalaryn jáne onyń keń taraýyna, júıeli jumys isteýine yqpal jasap keledi. Qazirgi ýaqytta Prezıdent teleradıokesheni «SilkWay» telearnasynyń otandyq medıanaryqtaǵy úzdik jobalaryn, Qyrǵyzstannyń aqparat keńistigine taralýyn júzege asyrýdy aıaqtady, endi naqty kelissózder júrgizip jatyr», - dedi T. Ábishev.
Al «Kazinform» halyqaralyq aqparat agenttigi – elimizdegi medıanaryqta jarııalaný jaǵynan eń úlken, eń iri ınternet-aqparat quraly. Agenttik kún saıyn júzge jýyq aqparatty 5 tilde – qazaq, orys, aǵylshyn, qytaı, ózbek tilderinde jáne tóte jazý men latyn qarpinde jarııalap keledi.
«Kazinform» halyqaralyq birlestikterdiń belsendi múshesi retinde sheteldik jýrnalıster men BAQ ókilderiniń qatysýymen ótken «Belt and Road News Network» atty baıqaýda qazylar alqasyna múshelik etip, Astrahanda ótken Kaspıı elderi medıaforýmy men Tashkentte ótken Ortaazııalyq sarapshylar forýmyna qatysty. Osylaısha óziniń halyqaralyq aqparattyq naryqtaǵy belsendiligin arttyrýdy josparlap otyr.
Sondaı-aq teleradıokeshen ókili eldegi oqıǵalar álemge ashyq aıtylyp, óz túsiniginde jetkizilýi keregin basa aıtty.
«Óıtkeni bizdiń eldegi ustanym ýaqyt ótken saıyn álemdik qaýymdastyqtyń qyzyǵýshylyǵyn arttyryp keledi. Jańǵyrý men jańartýǵa qadam jasaǵan saıyn qysqa kúnde qyryq qubylatyn qazirgi álemde medıa salasyna degen talap pen tilek kúsheıip keledi. Sondyqtan biz osy talaptyń údesinen shyǵa otyryp, Qazaqstannyń ǵana emes, Ahmet Baıtursynov aıtqandaı, búkil aımaqtyń kózi, qulaǵy hám tiline aınalýdy kózdeımiz. Bizdiń maqsat – Qazaqstannyń kún tártibindegi máselelerdi jahandyq deńgeıde nasıhattaı otyryp, ár ult pen elge qymbat, adamzatqa ortaq qundylyqtardy dáripteýden de arylmaıtyn arna bolý. Biz álemge jańa Qazaqstandy tanytýdy josparlap otyrmyz. Endeshe osy jaıly barynsha shynaıy aıtylǵan jón dep sanaımyz», - dedi Tilegen Ábishev.
Aıta keteıik, 20-21 jeltoqsan kúnderi Astanada birinshi Ortalyq Azııa medıaforýmy ótedi. Forýmda medıa mamandar men tanymal sarapshylar óńirdegi medıany damytýdyń ózekti máselelerin talqylap, Ortalyq Azııada ortaq medıa keńistik qurý ıdeıasyn saraptaıdy.