Álemge tanymal boksshylar Golovkındi jeńdi dep esepteıdi

ASTANA. QazAqparat - Búgin AQSh-tyń Las-Vegas qalasynda ótken jekpe-jekte qazaqstandyq boksshy Gennadıı Golovkın men meksıkalyq Saýl Alvares teń tústi. Alaıda tanymal boksshylar ondaı sheshimmen kelispeıdi, dep xabarlaıdy QazAqparat tilshisi.

Burynǵy álem chempıony Lenoks Lıýıs tóreshiler sheshimimen kelispeıdi. Onyń aıtýynsha, búgingi jekpe-jekte qazaqstandyq boksshy Gennadıı Golovkın jeńdi.

«Menińshe, Golovkın taza jeńdi. Alvarestiń aıaǵyna deıin shydaǵany unady. Negizi, tóreshiler kúlkili sheshim shyǵardy. Eki boksshy da baryn saldy. Alaıda, teń túsetindeı eshteńe bolǵan joq», - dep jazdy Lıýıs Twitter paraqshasynda.

Aty ańyzǵa aınalǵan Djordj Forman da GGG-diń basymdyǵyn atap ótti.

«Saýl bar kúsh-jigerin saldy, biraq Gennadıı búgin basym boldy», - deıdi ol.

Fılıppın boksshysy Mennı Pakıao bolsa, barlyq tóreshilerdiń kásibı daıyndyǵyna kúmán keltirdi.

«Bular tóreshilerdi Avstralııadan alyp kelgen be?», - dep jazdy Pakman.

Amerıkanyń taǵy bir tanymal boksshysy Pol Malınıadjı barlyǵyn aqsha sheship otyr deıdi. «Ókinishke qaraı, «Kanelo» sııaqty boksshylar qyrýar aqsha ákelse, sonyń arqasynda kóptegen adamdar baıyp jatady. Sondyqtan bul jerde barlyǵy jabylyp, «saýyn sıyrdy» qorǵap otyr», - deıdi Malınıadjı.

Rıo-Olımpıadasynda tóshilerdiń sheshimine ashyq narazylyq kórsetip, dóreki qylyǵymen kózge túsken ırlandııalyq boksshy Maıkl Konlan da óz pikirin bildirdi.

«118-110, bul ne?! Qyp-qyzyl ótirik! AIBA, taǵy sizder aralasqansyńdar ma?», - dep jazdy Konlan.

Búgingi jekpe-jekte Adelaıda Berd degen bir tóreshi «118-110 esebimen Alvares jeńdi» degen sheshim shaǵarǵan bolatyn. Onymen eks-chempıon Devon Aleksandr da kelispeıdi.

«Bul - taza essizdik! 118-110 esebin qalaı shyǵarýǵa bolady? Menińshe, Golovkın jeńdi», - dep jazdy Aleksandr óz paraqshasynda. Al birinshi orta salmaqtaǵy absolıýtti chempıon Terens Kroýford 118-110 esebimen Alvareske jeńis berip qoıǵan tóreshini jumystan qýyp shyǵý qajet dep sanaıdy.

Jalpy, amerıkalyq sarapshylardy arasynda «Kaneloǵa» qaraǵanda Denıel Djeıkobs Gennadıı Golovkınmen teń túsýge laıyqty» degen kózqaras bar.

Aıta keteıik, NVO Sports arnasynyń beıresmı tóreshisi Harold Lederman da Gennadıı Golovkın jeńdi de sanaıdy. Jekpe-jekten keıin efırde onyń esebi kórsetildi. Oǵan sáıkes, GGG 116:112 upaıymen jeńiske jetti.