Álemge áıgili «Notre Dame de Paris» mıýzıkli qazaq tilinde qoıylady

ASTANA. QazAqparat - Gınnestiń rekordtar kitabyna engen áıgili mıýzıkl álemniń 9 tiline aýdarylǵan. Endigi kezekte «Notre Dame de Paris» mıýzıkliniń keıipkerleri qazaq tilinde onynshy bolyp ún qatady, dep habarlaıdy QazAqparat tilshisi «Qazaqkontsert» memlekettik kontserttik uıymynyń baspasóz qyzmetine silteme jasap.

«Ortalyq Azııada tuńǵysh ret!  R.Kochchante men L.Plamondonnyń dańqyn órletken álemge áıgili «Notre Dame de Paris» mıýzıkliniń premerasyn Mádenıet jáne sport mınıstrliginiń «Qazaqkontsert» uıymyna qarasty «Astana Mıýzıkl» teatry usynady», - delingen habarlamada.
Gınnestiń rekordtar kitabyna engen mıýzıkl álemniń 9 tiline aýdarylǵan. Endi, «Notre Dame de Paris» mıýzıkliniń keıipkerleri qazaq tilinde onynshy bolyp ún qatady.
20 jyl buryn alǵash ret Parıj qalasynda qoıylǵan mıýzıkldiń qazaq sahnasynyń tórinen tabylýy elordamyz Astananyń 20 jyldyq mereıtoıymen tuspa-tus kelip otyr.
«Notre dame de Paris» mıýzıkliniń qoıylymy kórermenniń estetıkalyq talǵamyn arttyryp, elimizdegi mıýzıkl baǵytynyń damýyna, búkilálemdik óner sahnasynda Qazaqstannyń mýzykalyq teatr qoıylymdaryn nasıhattaýǵa zor úles qospaq. Notre dame de Paris» - álemdik mádenıettiń jaýharyna aınalǵan erekshe týyndy. Ýaqyt synynan ótip, talǵampaz kórermenniń ystyq yqylasyna bólengen mıýzıkl eshkimdi beıjaı qaldyrmasy anyq. Alǵashqy qoıylymynan-aq úlken tabysqa qol jetkizgen mıýzıkl ataqty klassık jazýshy V.Gıýgonyń romanynda baıandalǵan shynaıy mahabbat pen satqyndyq oqıǵasy, frantsýzdyq shanson men syǵan motıvine qurylǵan ásem áýezdi mýzyka, ǵajaıyp pen sıqyrǵa toly tsırk jáne akrobattar ónerimen órnektelgen. Mıýzıkl jelisinde oryndalatyn «Belle», «Danse mon esmeralda», «Le Temps des Cathedrales» sekildi elýge jýyq ánniń áýeni tyńdarmandy birden baýraıdy», - delingen habarlamada.
Osyǵan baılanysty «Qazaqconcert» memlekettik kontserttik uıymy álemge áıgili «Notre Dame de Paris» mıýzıkliniń qazaqsha nusqasyn qoıý úshin vokaldyq ánshilerge, bıshilerge jáne akrobattarǵa kastıng jarııalaıdy. Іrikteý Almaty qalasynda qazan aıynyń 9-y men 10-y saǵat 9:00-den 18:00-ge deıin M.Áýezov atyndaǵy Qazaq memlekettik akademııalyq drama teatrynda ótedi. 
«Úmitkerlerdi mıýzıkl avtorlary R.Kochchante men L.Plamondon, Frantsııadan arnaıy kelgen prodıýsserler men horeograftar qabyldaıdy. Baıqaýǵa 18-38 jas aralyǵyndaǵy talanttar qatysa alady. Tolyq aqparat qazaqconcert.kz saıty men  «qazaqconcert» ınstagramm jáne Feısbýk jelilerinde. Bul zamanaýı Qazaqstannyń tarıhyndaǵy aıtýly oqıǵa bolary anyq», - delingen «Qazaqkontsert» memlekettik kontserttik uıymynyń habarlamasynda.