Álemdik fýtbol juldyzdary Holand pen Edegor Almatydaǵy stadıonda jattyǵý ótkizdi

<p>ASTANA. KAZINFORM &ndash; Erteń, 6 qyrkúıekte Almatyda UEFA Ulttar lıgasynda Qazaqstan men Norvegııa quramalary sheberlik baıqasady. Osyǵan oraı Norvegııa quramasy baspasóz máslıhatynda jýrnalıster saýalyna jaýap berip, Ortalyq stadıonda alǵashqy daıyndyǵyn júrgizdi.&nbsp;</p>

Almatyǵa kelgen Norvegııa quramasy sapynda Erlıng Holand jáne Martın Edegor sekildi álem fýtbolynyń juldyzdary bar.

Foto: Aleksandr Pavskıı/ Kazinform

«Jol óte kúrdeli boldy. Biz quramadaǵy barlyq oıynshyny alyp keldik. Biz Qazaqstan quramasyndaǵy ár fýtbolshyny jaqsy bilemiz. Olar Danııa men Fınlıandııany jeńdi. Biz bul oıyndardy kórdik jáne burynǵy jáne qazirgi bapkerlerdi salystyrdyq. Sondaı-aq «Sılkeborg» sapynda Ramazan Orazovtyń oınaıtynyn bilemiz. Bizdiń toptaǵy quramalardyń barlyǵy deńgeıles. Árbiri bir-birinen upaı oljalaýy múmkin. Aldaǵy maqsatymyz – álem chempıonaty men Eýropa chempıonatynyń fınaldyq satysyna joldama alý. Bul – bizdiń qurama úshin úlken serpilis. Jıyrma jyldan beri biz eshqandaı dodalarǵa shyǵa alǵan joqpyz. Keıingi jyldardaǵy sátsizdik bizdi tańǵaldyrdy», - dedi Norvegııa quramasynyń bas bapkeri Stole Solbakken. 

Foto: Aleksandr Pavskıı/ Kazinform

Al, atalǵan quramanyń negizgi oıynshysy Martın Edegor aldaǵy kezdesýge daıyndyǵy jóninde oıymen bólisti. 

«Biz Qazaqstan quramasy jóninde kóbirek málimet alýǵa tyrystyq. Mundaı jumys árbir oıynnyń aldynda jasalady. Qarsylasty zertteımiz. Aldymen ózimizdiń oıynymyz ben myqty tusymyzdy oı eleginen ótkizemiz», - dedi ol.

Foto: Aleksandr Pavskıı/ Kazinform

Baspasóz máslıhatynan keıin Norvegııa quramasy Ortalyq stadıonnyń jasyl alańynda kezekti oıyn aldyndaǵy jattyǵýyn jasady. 

Aıta ketsek, Qazaqstan men Norvegııa quramalary 6 qyrkúıekte 19:00-de Almatynyń Ortalyq stadıonynda kezdesedi.