Álemdik BAQ-taǵy Qazaqstan: UQShU sessııasy, taýar aınalymyn ulǵaıtý jáne janarmaı áketýge tyıym
RIA: Qazaqstannyń UQShU-ǵa tóraǵalyǵy qorytyndylandy
Prezıdent Qasym-Jomart Toqaev Qazaqstannyń UQShU-ǵa tóraǵalyǵy kezinde barlyq mindetter oryndalǵanyn málimdedi. Bul týraly ol Astanada ótken UQShU Ujymdyq qaýipsizdik keńesiniń sessııasynda aıtty. Aqparatty reseılik RIA jańalyqtar qyzmeti taratty.
– UQShU – jaı ǵana áskerı seriktestik emes, memleketterimizdiń egemendigi men aýmaqtyq tutastyǵyn qorǵaý maqsatyndaǵy kúsh-jigerimiz ben resýrstarymyzdy biriktiretin biregeı mehanızm ekenin atap ótken lázim. UQShU tóraǵasy retinde Qazaqstan óz kúsh-jigerin ózara is-qımyldy nyǵaıtýǵa, daǵdarystyq jaǵdaılarǵa jedel den qoıý tetikteriniń tıimdiligin arttyrýǵa, sondaı-aq terrorızmdi, transulttyq qylmysty jáne esirtkiniń zańsyz aınalymyn qosa alǵanda, qaýip-qaterlerge qarsy kúreste uıym múmkindikterin damytýǵa shoǵyrlandyrdy. Qazaqstan Respýblıkasynyń tóraǵalyǵy kezinde qoıylǵan mindetterdiń bári oryndaldy, – dedi Toqaev sessııanyń ashylýynda.
Qazaqstan basshysy UQShU jarǵylyq organdarynyń otyrystary, áskerı oqý-jattyǵýlar men profılaktıkalyq operatsııalar josparly túrde ótkizilgenin aıtty. Ujymdyq qaýipsizdiktiń ózekti máseleleri syrtqy ister jáne qorǵanys mınıstrleri tarapynan jan-jaqty qaralyp, 2024 jyly qaýipsizdik keńesteriniń hatshylary men parlament basshylary deńgeıinde kezdesýler ótti.
Astanadaǵy sessııaǵa UQShU-ǵa múshe Qazaqstan, Reseı, Belarýs, Tájikstan jáne Qyrǵyzstan ókilderi qatysty. Al 2025 jyly tóraǵalyq Qyrǵyzstanǵa aýysady.
TACC: Qazaqstan men Reseı terrorızmge qarsy kúsh biriktirmek
Eki el terrorızmmen kúres úshin arnaıy qyzmetter jelisi boıynsha jedel jáne ózge de aqparattardy almasýǵa kelisti. Bul týraly Reseı Prezıdenti Vladımır Pýtınniń Qazaqstanǵa memlekettik sapary aıasynda Qasym-Jomart Toqaevpen ótkizgen kelissózderi boıynsha qabyldanǵan málimdemesinde jazylǵan. Jańalyqty TASS bólisti.
«Taraptar 2024 jyly Reseı Federatsııasynyń aýmaǵynda bolǵan terrorıstik aktilerdi qatań aıyptap, terrorızmniń aldyn alý jáne ymyrasyz kúresý maqsatynda arnaýly qyzmetter jelisi boıynsha tyǵyz baılanystardy júzege asyrýǵa, jedel jáne ózge de aqparatpen almasýǵa ýaǵdalasty», – delingen qujatta.
Buǵan qosa Astana men Máskeý sybaılas jemqorlyqqa qarsy baǵyttaǵy, onyń ishinde zańsyz satyp alynǵan aktıvterdi qaıtarý, ózara aqparat almasý jónindegi keshendi jumystardy jalǵastyrady.
Daryo: Qazaqstan men Reseı taýar aınalymyn 30 mlrd dollarǵa ulǵaıtýdy kózdeıdi
27 qarashada Qazaqstan Prezıdenti Qasym-Jomart Toqaev pen Reseı kóshbasshysy Vladımır Pýtın kelissózder júrgizip, onda ózara taýar aınalymyn 30 mlrd dollarǵa deıin ulǵaıtýǵa nıetti ekenderin jarııalady. Aqparatty ózbekstandyq Daryo jazdy.
Toqaevtyń aıtýynsha, Reseı Qazaqstannyń iri ınvestorlarynyń úshtigine kiredi jáne eldiń basty saýda seriktesteriniń qatarynda. Qazaqstan da alǵash ret Reseıdiń iri saýda seriktesteriniń birine aınalyp otyr. Eki el osylaısha pozıtıvti dınamıkany saqtaýǵa tyryspaq.
Qazir Qazaqstanǵa salynǵan reseılik ınvestıtsııalar kólemi 24 mlrd dollardan asty. Onyń 4,5 mlrd dollardan astamy keıingi 2 jylda salynǵan. Óz kezeginde Reseı ekonomıkasyna salynǵan qazaqstandyq ınvestıtsııalar 8,5 mlrd dollarǵa jetti. Qazaqstanda Reseıdiń qatysýymen 24 myńǵa jýyq kásiporyn jumys isteıdi, bul eldegi barlyq sheteldik kompanııalardyń jartysyna jýyǵyn quraǵan.
Taraptar iri jobalar sheńberinde yntymaqtastyqty belsendi damytýda. Qazir jalpy quny 18 mlrd dollar bolatyn 93 joba iske asyryldy. Quny 30 mlrd dollar bolatyn taǵy 49 joba iske asyrylýda. Onyń aıasynda Qazaqstan óńirlerin gazdandyrýǵa, energetıkalyq obektiler salýǵa jáne kólik dálizderin damytýǵa erekshe nazar aýdaryldy.
Qasym-Jomart Toqaev bul bastamalardy iske asyrý eki memlekettiń múddesine saı keletinin jáne strategııalyq áriptestikti odan ári nyǵaıtýǵa yqpal etetinin atap ótti.
Anadolu: 2025 jyldan bastap Qazaqstan aýmaǵynan janarmaı áketýge tyıym salynady
Energetıka mınıstrligi «Qazaqstan Respýblıkasynyń aýmaǵynan munaı ónimderin áketýdiń keıbir máseleleri týraly» UQK, ІІM jáne Qarjy mınıstrligimen birlesken buıryǵyna tolyqtyrý jobasyn daıyndady. Munda 2025 jyly 1 qańtardan bastap QR jerinen EAEO kedendik aýmaǵynan tys óńirlerge jeńil dıstıllıattardy, avıakerosınderdi jáne dızel otynyn, gazoıldardy, tolýoldy, ksıloldy, munaı bıtýmyn áketýge tyıym salý týraly jazylǵan. Buıryqty tolyqtyrý jobasy týraly jańalyqty túrkııalyq Anadolu agenttigi bólisken.
Shekteý jarty jyl merzimge engizilmek. ıAǵnı, 6 aı boıy Qazaqstan Eýrazııalyq ekonomıkalyq odaqqa kiretin elderdi aıtpaǵanda, ózge memleketterge janarmaı tasymaldaýǵa múlde jol ashpaıdy.
Aıtpaqshy, buǵan avtomobıl zaýyttaryndaǵy benzın baktaryn áketý, telimderdi irikteý jónindegi ǵylymı-zertteý jumystaryna, zerthanalyq synaqtar júrgizý úshin avıatsııalyq otyndy áketý, sondaı-aq úkimettiń sheshimi boıynsha kómek sheńberinde áketiletin munaı ónimderiniń jekelegen túrleri kirmeıdi.
Energetıka mınıstrliginiń túsindirýinshe, qazir elimizde AI-92 jáne dızeldik otyn tutyný kólemi edáýir ulǵaıǵan. Sondyqtan EAEO aýmaǵynan tysqary jerlerge munaı ónimderin áketýge tyıym salý – qazaqstandyq munaı óńdeý zaýyttarynyń qýatyn saqtap qalýǵa, tıisinshe Qazaqstanda janarmaı tapshylyǵyn azaıtýǵa, bajsyz jetkizý sharttaryn oryndaýǵa jáne ımporttyq munaı ónimderiniń keri eksportyn boldyrmaýǵa múmkindik beredi.
Ázirge buıryqtyń tolyqtyrý jobasy «Ashyq NQA» portalynda kópshiliktiń talqylaýyna usynyldy. 2024 jyldyń 10 jeltoqsanyna deıin ornalastyrylǵan.