Álemdik BAQ-taǵy Qazaqstan: Toqaevtyń Boao forýmyndaǵy sózi, Almatydaǵy jańa kólik zaýyty, AQSh-pen yntymaqtastyq

<p><strong>2024 jyldyń birinshi toqsany da aıaqtalyp qaldy. Naýryzdyń sońǵy aptasynda sheteldik basylymdar Qazaqstan týraly túrli aqparat jazdy. Onyń ishinde Memleket basshysynyń Boao forýmyna qatysqany, elimizde qytaılyq brendtiń kólik zaýyty salynatyny týraly jáne basqa jańalyqtar taratty. Álemdik BAQ Qazaqstan týraly taǵy ne jazdy &ndash; tolyǵyraq <a href="https://kaz.inform.kz/" target="_blank" rel="noopener">Kazinform</a> tilshisiniń sholýynan oqyńyz.</strong></p>

The Times of Central Asia: Qazaqstan qytaılyq KAIYI brendiniń avtomobılderin shyǵara bastaıdy

Qazaqstandyq Orbis Manufacturing kólik kompanııasy Almatynyń ónerkásiptik aımaǵynda qytaılyq KAIYI brendimen avtomobıl shyǵaratyn tolyq tsıkldi zaýyt salýdy josparlap otyr. Bul týraly The Times of Central Asia habarlady.

Basylymnyń málimetinshe, Astanadaǵy qazaqstandyq eksporttaýshylardyń ekinshi forýmynda «Orbıs Qazaqstan» enshiles kompanııasy qytaılyq Yibin Kaiyi Automobile Co kompanııasymen yntymaqtastyq týraly memorandýmǵa qol qoıdy.

Biz jetekshi Qytaı brendteriniń joǵary tehnologııalyq avtomobılderin óndirýdi uıymdastyrýǵa shamamen 72 mlrd teńge ($160 mln) ınvestıtsııa salýdy josparlap otyrmyz, - dep bólisti basylym «Orbıs Qazaqstan» prezıdenti Sýhrab Mahmýdovtyń sózin.

Agenttiktiń jazýynsha, «Orbıs Qazaqstan» qazir óndiristik jeliniń jobalaý-smetalyq qujattamasy boıynsha jumys aıaqtalyp jatyr. Zaýyttyń óndiristik qýaty jylyna 80,00 avtomobıl deńgeıinde josparlanǵan. Bastapqyda zaýytta 1500 jumys orny ashylady.

Osy aptada, naqtyraq aıtsaq 28-29 naýryzda Qazaqstan Prezıdenti Qasym-Jomart Toqaev Qytaıdyń Haınan provıntsııasynda ótken Boao Azııa forýmyna qatysyp, plenarlyq sessııasynda arnaıy meıman retinde sóz sóıledi. Memleket basshysy forýmda qandaı mańyzdy máselelerdi qozǵaǵanyn jáne otandyq sarapshylar bul týraly qandaı pikir bildirgenin jazǵanbyz.

Sondaı-aq, Qasym-Jomart Toqaevtyń baıandamasyn álemdik BAQ jarysa jazdy. Olar Prezıdenttiń messedjderin bólisti. Solardyń birqataryna toqtalaıyq.

Nova News: Toqaev Boao forýmynda: Qazaqstan jahandyq azyq-túlik turaqtylyǵyna óz úlesin qosqysy keledi

Bolgarııalyq Nova News agenttigi Qasym-Jomart Toqaevtyń Boao forýmynyń plenarlyq sessııasyndaǵy málimdemesi jaıly jazdy.

Qazaqstan Dúnıejúzi turǵyndarynyń shamamen úshten bir bóligi áli de sezinip otyrǵan azyq-túlik tapshylyǵy máselesin sheshý úshin jahandyq azyq-túlik turaqtylyǵyn qamtamasyz etýge umtylady. Bul týraly Qazaqstan Prezıdenti Qasym-Jomart Toqaev Qytaıdyń Haınan provıntsııasynda ótken Boao Azııa forýmynda sóılegen sózinde aıtty, – dep jazdy basylym.

TASS: Qazaqstan álemdik azyq-túlik turaqtylyǵyn qamtamasyz etýge úles qosýǵa nıetti

Reseıdiń TASS agenttigi de Memleket basshysynyń Boao forýmyndaǵy sóılegen sózine nazar aýdaryp, aqparat taratty.

Sondaı-aq basylym «qazaqstandyq kóshbasshy Azııa elderi arasyndaǵy tranzıt-kóliktik yntymaqtastyqty keńeıtýdiń strategııalyq mańyzyna toqtaldy, dep jazdy.

Qoldanystaǵy jáne jańa kólik baǵyttaryn damytý úshin barynsha kúsh-jiger jumsaý asa mańyzdy. Transkaspıı halyqaralyq kólik baǵyty nemese «Orta dáliz» osy sanatqa jatady. Atalǵan kólik baǵdary Azııa men Eýropa arasyndaǵy jetkizý tizbeginiń qaýipsizdigin áldeqaıda tıimdi qamtamasyz etedi. Byltyr osy baǵyttaǵy júk tasymaly eki ese artyp, 3 mıllıon tonnaǵa jetti. Aldaǵy jyldary bul kórsetkish 10 mıllıon tonnaǵa jetedi degen boljam jasap otyrmyz. Sondaı-aq Qazaqstan «Soltústik – Ońtústik» dálizin damytýda kórshi eldermen yntymaqtastyq ornatýǵa daıyn, – dep keltirdi agenttik Toqaevtyń sózin.

Daryo Qazaqstan men Qytaıdyń ekijaqty saýdasy rekordtyq 41 mlrd dollarǵa jetti

Ózbekstandyq Daryo agenttigi Boao forýmynda sóz sóılegen Qasym-Jomart Toqaevtyń baıandamasyndaǵy Qazaqstan men Qytaı qarym-qatynasynyń nátıjelerin bólisken. Sonymen qatar, basylym Memleket basshysynyń Boao forýmyna joǵary baǵa bergenin de jazdy.

Jınalǵan halyqaralyq kóshbasshylar men delegattar aldynda sóılegen sózinde Prezıdent Toqaev qubylmaly geosaıası ahýal men ekonomıkalyq qıynshylyqtyń saldarynan týyndaǵan jahandyq turaqsyzdyq jaǵdaıynda Boao forýmy platformasy dıalog pen halyqaralyq yntymaqtastyq ortalyǵy retinde mańyzdy ról atqaratynyn atap ótti, – dep jazdy Daryo.

Azernews: Qazaqstan men AQSh energetıka jáne paıdaly qazbalardy barlaý salasyndaǵy yntymaqtastyqty talqylaýda

Sondaı-aq, osy aptada ázerbaıjandyq basylym Azernews Qazaqstan Prezıdenti Qasym-Jomart Toqaevtyń AQSh senatory Stıv Denıspen kezdesýi týraly jazdy. Agenttik eki jaq saýda-ekonomıkalyq yntymaqtastyq máseleleri boıynsha pikir almasqanyn habarlady.

Basylymnyń málimetinshe, Toqaev kezdesýde Qazaqstan ınvestıtsııa tartý, ekonomıkany yryqtandyrý jáne ónerkásipti damytý isine erekshe nazar aýdarylyp otyrǵanyn málimdedi.

Onyń aıtýynsha, energetıka, paıdaly qazbalardy barlaý ári óńdeý, ınfraqurylymdy jańǵyrtý jáne basqa da salalar ekijaqty qarym-qatynastardyń negizgi baǵyttary sanalady. Taraptar halyqaralyq jáne óńirlik qaýipsizdik máselesine basa mán berdi, – dep jazdy ázerbaıjandyq agenttik.