Álemdik BAQ-taǵy Qazaqstan: Prezıdent suhbaty, japondar úmiti jáne Londondy tańǵaldyrǵan qazaq ushaǵy

<p><strong>Osy aptada sheteldik basylymdar Memleket basshysy Qasym-Jomart Toqaevtyń Egemen Qazaqstan gazetine bergen suhbaty týraly jarysa jazdy. Budan bólek Japonııanyń Qazaqstan úkimetimen qańtarda ekonomıka jáne energetıka salasynda memorandýmǵa qol qoıýǵa úmittenetinin habarlady. Tolyǵyraq Kazinform tilshisiniń sholýynan oqı alasyz.</strong></p>

Toqaev: Qazaqstan ózgerdi, eski júıege oralý múmkin emes

Saıası reformalar, ekonomıkalyq damý jáne halyqaralyq qatynastar – Qazaqstan Prezıdenti Qasym-Jomart Toqaevtyń Egemen Qazaqstangazetine bergen suhbatynda ótken jyldy qorytyndylap, endi bastalǵan jyldyń basymdyqtaryn belgilegen aýqymdy suhbatynyń negizgi taqyryby. Memleket basshysynyń osy jyldaǵy alǵashqy suhbaty týraly Nova agenttigi osyndaı taqyryppen jazdy.

Toqaev ótken qyrkúıekte aıtqanyn eske túsirip, kóp uzamaı áleýmettik-ekonomıkalyq damýdy túgendeý jáne «2029 jylǵa qaraı jalpy ishki ónimdi eki esege arttyrý» strategııalyq maqsatyna sáıkes ári qaraıǵy sharalardy sheshý úshin «úkimettiń keńeıtilgen otyrysy» ótetinin jarııalady, – dep jazdy basylym.

 

Qańtar oqıǵasy kezinde Qazaqstan Reseıden emes, UQShU-dan kómek surady – Prezıdent Toqaev

Al, ázerbaıjandyq trend.az basylymy Memleket basshysynyń suhbatyndaǵy qańtar oqıǵasy jáne sol kezdegi Ujymdyq qaýipsizdik týraly shart uıymynyń kómegi týraly pikirin keltirdi.

Prezıdent Toqaev 2022 jyly Qazaqstanda bolǵan oqıǵalar kezinde tolqýdy toqtatýda mańyzdy ról atqarǵan UQShU kontıngentiniń bitimgershilik rólin erekshe atap ótti. UQShU bitimgerlik kúshteri lańkes­tikke qarsy operatsııalarǵa qatys­qan joq, birde-bir oq atqan joq dedi. Uıymǵa múshe eldermen kelisilgendeı UQShU kontıngenti elden syrtqa eshbir kidirissiz shyǵaryldy, – dep keltirdi Qazaqstan Prezıdentiniń sózin basylym.

 

Qazaqstan Prezıdenti Toqaev: Biz ozyq oıly ult retinde tek alǵa qaraýymyz kerek

The Times of Central Asia basylymy Memleket basshysynyń suhbatyndaǵy mańyzdy tustarǵa toqtalǵan. Qasym-Jomart Toqaevtyń ulttyq qundylyq, syrtqy saıasat, saıası reformalar, ekonomıkalyq maqsat pen energetıkalyq qaýipsizdik jáne basqa taqyryptarǵa qatysty aıtqan pikirin jarııalaǵan.

Syrtqy saıasatqa qatysty Toqaev óz úkimetiniń «ózgermeıtin» basymdyqtaryn «eldiń egemendigi men aýmaqtyq tutas­tyǵyn saqtaý, Qazaqstan azamat­tarynyń quqyqtary men múddelerin qorǵaý, ekonomıkanyń ornyqty damýyna barynsha qolaıly jaǵdaı jasaý» dep qorytyndylady. Suhbatta Qazaqstannyń qýatty kórshileri Reseı jáne Qytaımen qarym-qatynasy, sondaı-aq eldiń halyqaralyq rólin nyǵaıtý, mysaly, Halyqaralyq Astana forýmyn jáne 2024 jyly Frantsııamen «Ortaq sý» sammıtin ótkizý týraly negizgi ıdeıalar ashyldy, – dep jazdy basylym.

 

Sonymen qatar, reseılik TASS agenttigi «Toqaev aldaǵy Reseı prezıdenti saılaýynyń álemdik saıasat úshin mańyzyn atap ótti» degen taqyryppen, Memleket basshysynyń suhbattaǵy oıyn bólisti.

Bıyl Reseıde ǵana emes, AQSh-ta, Ulybrıtanııada, Úndistanda, Ázer­baıjanda jáne basqa da memleketterde saılaý ótedi. Sondaı-aq Eýroparlament depýtattary saılanady. Árıne, biz osy saılaý naýqandaryn jiti baqylap otyramyz. Reseıde ótetin prezıdent saılaýy­nyń biz úshin máni zor ekeni sózsiz. Óıtkeni Astana men Máskeý arasynda óte joǵary deńgeıde qarym-qatynas ornaǵan, – dep keltirdi Prezıdenttiń sózin agenttik.

 

Sheteldik basylymdar Memleket basshysy Qasym-Jomart Toqaevtyń suhbatynan basqa qandaı mańyzdy tustardy atap ótkenin myna silteme arqyly oqı alasyz.

 

Japonııa Ortalyq Azııa elderin dekarbonızatsııalaý jumysyn kúsheıtemiz dep úmittenedi

Japonııa úkimeti yntymaqtastyq týraly memorandýmǵa qol qoıý arqyly Ortalyq Azııanyń bes elimen dekarbonızatsııalaý (qorytpadan nemese basqa materıaldan kómirtekti alý protsesi – red.) salasyndaǵy baılanystardy nyǵaıtýǵa nıetti. Olardyń josparyna sáıkes, japonııalyq fırmalar bes eldiń úkimeti men bıznesine jańartylatyn energııa kózderi, energııa únemdeıtin tehnologııalardy engizýge kómektesedi. Bul týraly thejapannews jazdy.

Ortalyq Azııanyń bes memleketi – Qazaqstan, Qyrǵyzstan, Tájikstan, Túrikmenstan jáne Ózbekstan – tabıǵı resýrstarǵa baı. «Úlken jetilik» elderi Ortalyq Azııamen baılanystardy damytýǵa da umtylatyndyqtan, Japonııa óziniń qorshaǵan ortany qorǵaý tehnologııasymen Qytaı men Reseıden alǵa shyǵýǵa umtylýda. Bul salada aımaq – kóshbasshy. Japonııa Ózbekstan jáne Qazaqstan úkimetterimen qańtarda ekonomıka jáne energetıka salasynda memorandýmǵa qol qoıýǵa úmittenedi. Ekonomıka, saýda jáne ónerkásip mınıstri Ken Saıto eki eldiń tıisti mınıstrlerimen kezdesýdi josparlap otyr, – dep jazdy basylym.

Qazaqstanda 1,5 myń jyldyq tarıhy bar, «taqqa otyrǵan ámirshi» beınelengen altyn toǵalar tabyldy

Oıý-órnekterde VI ǵasyrda ómir súrgen kóktúrik «qaǵanynyń» eń ertedegi beınesi bar. Live Science tilshisi ǵylymı jańalyqtyń avtory Zaınolla Samashevtan elektron poshta arqyly suhbat alǵan.

Qazaqstandyq arheologtar 1500 jyl burynǵy qabirden eki altyn áshekeı tapty, onda uly hannyń nemese «qaǵannyń» eń kóne beıneleri bar. Arheologtardyń aıtýynsha, olar aımaqty shamamen úsh ǵasyr mekendegen. Qazba jumystaryn júrgizgen Qazaqstan arheology Zaınolla Samashev elektrondy poshta arqyly Live Science tilshisine bergen suhbatynda «ádemi altyn taqtaıshalarda táj kıgen, áýlıe keıipte, taǵynda saltanatty túrde otyrǵan jáne ony qyzmetshiler qorshap turǵany» beınelengen dep atap ótti. «Bul kóne túrki qoǵamyndaǵy bıliktiń kıeli sıpatyn aıqyn kórsetedi, – dep jazdy basylym.

 

Qazaqstandyq áýekompanııa ushaǵynyń qonýy

BBC News Instagram paraqshasynda qazaqstandyq ushaqtyń qonǵan sáti túsirilgen vıdeo jarııalandy.

Sheteldik BAQ-tyń málimetinshe, bul kúni qýatty daýyl Ulybrıtanııada kóliktiń barlyq túrine aıtarlyqtaı kedergi keltirdi.

Birneshe reısti basqa áýejaılarǵa aýystyrýǵa májbúr boldy. Alaıda keıbir reıs, sonyń ishinde Air Astana KC663 reısi aýa raıynyń qolaısyzdyǵyna qaramastan Hıtroý áýejaıyna qondy, – dep habarlady basylym.