Álemdik BAQ-taǵy Qazaqstan: Quryq tabanyn tereńdetý, ýaqyt beldeýi, qonaqúıdegi túrik úlesi men gaz baǵasy
Daryo: Kazaqstan suıytylǵan gazdyń kóterme baǵasyn ózgerissiz qaldyrmaq
QR Energetıka mınıstrligi ishki naryqtaǵy suıytylǵan munaı gazynyń shekti kóterme baǵasyn 45 158 teńge kóleminde saqtaýǵa nıetti. Bul – janama salyqtardy esepke almaǵandaǵy baǵam. Jobaǵa sáıkes, kórsetilgen baǵa 2025 jyldyń 1 qańtar men 30 maýsym aralyǵynda qoldanylady. Aqparatty Daryo bólisti.
Este bolsa, vedomstvo maýsym aıynda osy baǵany engizgen bolatyn. Ol kezde meje 2024 jyldyń 1 shildesi men 31 jeltoqsany aralyǵynda qoldanysta bolady dep mejelengen. Mınıstrlik mundaı sheshimdi ishki naryqtaǵy turaqtylyqty qamtamasyz etý úshin jasaǵanyn jetkizdi. Jobanyń túsindirme jazbasyna sensek, bastama QR-nyń «Gaz jáne gazben jabdyqtaý týraly» Zańy men Suıytylǵan gazdyń kóterme saýdadaǵy shekti baǵasyn belgileý qaǵıdasy negizinde ázirlengeni aıtylypty. Sondaı-aq mınıstrlik buıryqty júzege asyrý qosymsha bıýdjettik shyǵyndy talap etpeıdi ári eldegi áleýmettik-ekonomıkalyq jaǵdaıǵa teris áseri joq degen oıda.
Búginde qujat jobasy jarııa talqy úshin «Ashyq NQA» portalynda ornalastyrylǵan. Múddeli taraptar, sonyń ishinde bıznes ókilderi men sarapshylar bıyl 5 jeltoqsanǵa deıin usynys pen eskertpesin qosa alady. Qujat talqylaý aıaqtalǵannan keıin jáne túzetýler engizilgen soń keler jyldan bastap kúshine enedi.
Jalpy baǵany turaqtandyrý eldegi energetıkalyq qaýipsizdik saıasaty, ishki naryqtaǵy suranysty baqylaý sheńberinde qolǵa alynyp otyr. Ótken jyly Úkimet turǵyndar men kásipkerlerdiń suranysyn qamtamasyz etý úshin suıytylǵan gaz eksportyna arnalǵan shekteýdi uzartqan bolatyn.
Report: Quryq portynyń tabanyn tereńdetý jumysy aıaqtaldy
Transkaspıı halyqaralyq kólik baǵytyn (THKB) damytý aıasynda Quryq portynyń tabanyn tereńdetý jumysy merziminen buryn bitti. Qazirgi ýaqytta sý aıdyny men porttyń kireberis kanalynyń tereńdigi 7-8 metrge deıin jetedi. Bul porttaǵy kemelerge júkti tolyq tıeýge múmkindik beredi degen boljam bar. Jańalyqty Report basylymy habarlady.
«4 aı ishinde bas merdiger «Jan De Nul Kazakhstan» JShS Kaspıı teńizindegi eń qýatty «Vesalius» jer snarıadynyń kómegimen qajetti jumysty júrgizdi. Alynǵan topyraqtyń kólemi 990 000 tekshe metrden asty», – delingen habarlamada.
Atalǵan jumysqa «Jan De Nul Kazakhstan» JShS-nyń tórt kemesi, qazaqstandyq merdigerlerdiń býksıri men tehnıkasy, otandyq jobalaý jáne sıýrveıerlik kompanııasy jumyldyrylǵan. Joba aıasynda 50-den astam jumys orny qurylypty. Quryqtyń tabanyn tereńdetý nátıjesinde porttyń termınaldyq qýaty artyp, múmkindigi molaıa túsken. Oǵan qosa Transkaspıı halyqaralyq kólik baǵytynyń mańyzyn arttyrýǵa ári júk kólemin kóbeıtýge jol ashylmaq.
Aıta keteıik, Quryq portynyń jobalyq qýaty jylyna 6 mln tonnany quraıdy. Onyń ishinde 4,1 mln tonnasy – temir jol tasymaly bolsa, 1,9 mln tonnasy avtokólik tasymalynyń úlesinde.
CentralAsia: Qazaqstan sýtegi bastamasyna qosyldy
QR Energetıka mınıstrligi SOR29 Energetıka kúni aıasynda «Jasyl energetıka jáne ınnovatsııalar: Qazaqstannyń ınvestıtsııalyq múmkindikteri» paneldik sessııasyn ótkizdi. Bul týraly CentralAsia aıtty.
Basqosýda Qazaqstannyń energetıka vıtse-mınıstri Suńǵat Esimhanov Qazaqstannyń jasyl energetıkany damytýdaǵy maqsaty, jańartylatyn energııa kózderiniń úlesin arttyrý, atom jáne sýtegi energetıkasy týraly taqyrypty talqylady. Sondaı-aq antropogendik metan shyǵaryndysyn azaıtý jáne «jasyl qarjylandyrý» ıdeıasyn saralaǵan. Іs-sharaǵa «Masdar», EQDB jáne Azııa damý banki sekildi ınvestıtsııalyq qaýymdastyq ókilderi qatysty.
Sonymen qatar Energetıka vıtse-mınıstri Qazaqstannyń sýtegi bastamasyna (Hydrogen Breakthrough Agenda) qosylǵanyn málimdedi. Oǵan qosa Ázerbaıjan men halyqaralyq uıymdar uıymdastyrǵan sessııaǵa qatysty, jasyl energetıka sektoryna ınvestıtsııalar tartý máselesin qozǵady.
– Bul bıyl qabyldanǵan Sýtegi energetıkasyn damytý tujyrymdamasyn ilgeriletýge jol ashpaq. Al Qazaqstannyń batysynda «Svevind» nemis kompanııasymen sýtegi boıynsha birlesken jobany júzege asyrý sýtegi energetıkasynyń damýyna yqpal etetin bolady, – dedi ol.
TASS: Biryńǵaı ýaqyt beldeýine kóshý – tarıhqa negizdelgen
Qazaqstan Úkimeti bir jylǵa jýyq daý-damaıǵa aınalǵan biryńǵaı ýaqyt beldeýine kóshý bastamasyn eksperıment emes, tarıhı negizi bar sheshim dep sanaıdy. Saýda jáne ıntegratsııa mınıstri Arman Shaqqalıevtyń aıtýynsha, Keńes dáýirinde belgilengen ýaqyt beldeýi tabıǵı tsıklge jat, al burynǵy ýaqyt beldeýin qaıtarýdy talap etýshiler máseleniń mánin túsinbeýde. Mınıstr sózin TASS taratty.
– Qazaqstandaǵy ýaqytty esepteý júıesiniń qalyptasý tarıhy burynǵy UTC+6 beldeýi alǵash ret 1930-1931 jyldary dekrettik ýaqytty (beldeý ýaqytyna bir saǵat qosý) qoldaný arqyly engizilgenin kórsetedi. Bul rette eldiń kóp bóligi is júzinde 5-shi ýaqyt beldeýinde ornalasqan edi. Jalpy Keńes dáýirinde Qazaqstanda tabıǵı ýaqyt beldeýi josparly ekonomıka múddesi úshin 8 ret buıryqpen ózgertilgen. Sonyń saldarynan el turǵyndary tabıǵı tsıklge sáıkes kelmeıtin ýaqyt beldeýlerinde ómir súrip keldi, – dedi A.Shaqqalıev.
Onyń sózinshe, Qazaqstan buǵan deıin tabıǵı tsıklden tys ýaqyt beldeýine súıenip kelgen. Sondyqtan «UTC+5 – jańa ýaqyt beldeýi eksperıment emes, kerisinshe, tarıhqa negizdelgen ýaqytqa oralý», – dep túsindirdi mınıstr.
A.Shaqqalıev máselede arnaıy bilimi men quzyreti joq adamdar áleýmettik jelilerde jaǵymsyz pikir qalyptastyrýǵa tyrysqanyn aıtýda. Olar kúndelikti ómirine yńǵaıly bolý úshin negizsiz aqparat taratqan. Petıtsııany qaraý jónindegi jumys toby barlyq turmystyq argýmentti zerdelep, densaýlyq pen ekonomıkaǵa teris áser etetin sebep-saldar tappaǵan.
Anadolu: Qonaqúı ındýstrııasyn damytýda túrik meımanhana ıeleriniń úlesi zor
Astanadaǵy túrik qonaqúıler jelisiniń bas menedjeri, professor Tansel Terjan «Túrik áńgimeleri» sharasy aıasynda qazaqstandyq jastarmen kezdesti. Ol týrızm salasyndaǵy 30 jyldyq tájirıbesin baıandap, Qazaqstandaǵy júzdegen qonaqúı bıznesi qyzmetkerin oqytý jumysy týraly aıtypty. Kezdesý týraly maqalany Anadolu agenttigi jarııalaǵan.
Professor Astanadaǵy Júnis Ámire ınstıtýty uıymdastyratyn dástúrli «Túrik áńgimeleri» sharasy aıasynda týrızm mamandyǵynda oqıtyn jáne túrik tilin úırenip júrgen jastarmen jolyqqan. Onyń aıtýynsha, týrızm salasyna qazaqstandyqtardy baýlý isi 9 jyl buryn bastalǵan, qazir de jalǵasýda. Osy ýaqytqa deıin mamannan sabaq alǵan shákirtteri bedeldi qonaqúılerde jumys istep keledi.
– Jeke tálimger retinde týrızmnen múlde habary joq 50-den astam jasqa bilgenimdi úırettim. Sonyń ishinde 15 shákirt qonaqúı ındýstrııasyna sińisip, bas menedjer dárejesine jetti. Oǵan qosa birlesken jobalar aıasynda 3 myńnan astam adamnyń meımanhana sektoryndaǵy daǵdysyn damytýǵa septestim.
Qazaqstan men Túrkııa – tamyrlas el. Eki memleket tek mádenı týrızmmen shektelmeı, keń taralǵan ekotýrızm, densaýlyq saqtaý týrızmi, tabıǵat aıasyndaǵy týrızm sekildi balama jolǵa kóńil bólgeni jón, - dep qorytyndylady maman.